ამ ინციდენტში ფიგურირებს სუბელიანი და ის აუცილებლად უნდა დაიკითხოს - აცხადებს, ხორავას ქუჩაზე მომხდარი სისხლიანი გარჩევის შედეგად, მოკლული დავით სარალიძის მამა, ზაზა სარალიძე. მისი განმარტებით, ექსპერტიზის დასრულებას მიზანმიმართულად აჭიანურებენ.
"მიმდინარეობს იმ ექსპერტის დაკითხვა, რომელმაც ექსპერტიზა ჩაუტარა ლევან დადუნაშვილს. ექსპერტი ამბობს, რომ დადუნაშვილს გულის, ბარძაყის არეში აქვს მიყენებული ჭრილობა და ამასთან ორივე ხელის მტევანზე აქვს, ალბათ იგივე ან სხვა დანით მიუენებული ჭრილობები, რაც მე პირადად საფუძვლიან ეჭვს მიჩენს რომ ლევან დადუნაშვილი მხოლოდ ერთი დანით არაა მოკლული. ეს ჩემი აზრია. მთავარი აქ არის კომპლექსური ექსპერტიზის პასუხი რომელსაც დიდი ხანია ველოდებით. იქ ყველაფერი გამოჩნდება, თუ რა თქმა უნდა, სიმართლე თქვეს. აქვს თუ არა ექსპერტიზის გაჭიანურებასთან დაკავშირებით ეჭვი, პასუხობს რომ აქვს. "კომმპლექსურ ექსპერტიზაზე კითხვა თებერვალში დაისვა, რომელიც ამ საქმეში ყველაზე მთავარი იყო. ეს არამარტო ჩემი აზრია, არამედ გამოძიებისთვისაც მთავარი კითხვა უნდა ყოფილიყო. 1 დეკემბერს მოხდა მკვლელობა და ფაქტობრივად ორი თვის შემდეგ დასვეს კითხვა, რომელიც აქამდე უნდა დასმულიყო. რა თქმა უნდა, ექსპერტიზა სპეციალურად ჭიანურდება რათა ჯერ მოწმეები დაკითხონ და შემდეგ მოარგონ ექსპერტიზის პასუხი ამ მოწმეების პასუხებს", - აცხადებს სარალიძე.
მისი თქმით, მის შვილსა და ლევან დადუნაშვილს მხოლოდ ორი პიროვნება ვერ მიაყენებდა ჭრილობებს.
"ჩემ შვილს ისეთი კოლექციით აქვს ჭრილობები მიყენებული, შეუძლებელია, ორ პიროვნებას მიეყენებინა ეს ჭრილობები. ამას იმიტომ ვაცხადებ, რომ ჩემი შვილის მონაცემები, მე თვითონაც კარგად ვიცი. მას ძალისმიერი აღნაგობა ჰქონდა. თუ მხოლოდ ეს ორი ურტყამდა ჩემს შვილს, გამოდის, რომ აკავებდნენ, ან იდგა ჩემი შვილი და ეს ორი ბავშვი ურტყავდა დანას", - აღნიშნავს დაზარალებული.
მისვეი განმარტებით, ყოფილი პროკურორის, მირზა სუბელიანის დაკითხვა აუცილებელია. "წესით უნდა დაიკითხოს, რადგან თენგიზ კალანდიას დაკითხვის ოქმიდან, რომელიც გაჟღერდა, ამ ინციდენტში ფიგურირებს სუბელიანი და ის აუცილებლად უნდა დაიკითხოს", - აცხადებს სარალიძე.