კონკრეტული საქმე, რის გამოც, ვითომ აბესაძემ ქრთამი აიღო, დასრულებული არ იყო. რაც ნაწილობრივ იყო გაკეთებული, კანონით იყო გაკეთებული. არქიტექტურის სამსახურის დასკვნა დამთავრებული იყო, მაგრამ საბოლოო დასკვნა, რომელიც კომისიას უნდა გაეცა, არ იყო დასრულებული - აცხადებს აბესაძის ადვოკატი, ნონა ფილაური.
მისი განმარტებით, მოწმეები აბესაძის ბრალეულობას ვერ ადასტურებენ.
"მოწმემ განაცხადა, რომ ოთარ აბესაძემ ზოგადად იკითხა, თუ როგორ შეიძლებოდა დაჩქარებული წესით აღებულიყო ნებართვა. ამაზე მან არქიტექტურის სამსახურის უფროსის მოადგილისგან პასუხი მიიღო, რომ თუ საქმეში განცხადებასთან ერთად ქვითარიც თუ არ იდებოდა, დაჩქარებული წესით ნებართვის მომზადება ფიზიკურად შეუძლებელი იყო, ეს პროგრამულად ვერ მოხდებოდა.
ნებართვა ნაწილობრივ იყო გაცემული,აქ არ იყო საბოლოო ნებართვა. სავარაუდოდ, დასკვნა ბოლომდე არც იყო მომზადებული, ისე დააკავეს ოთარ აბესაძე.
ფარულ ვიდეოჩანაწერში აბესაძე ფულს არ იღებს, მის გვერდით ჯდება მეგობარი და ფულს უდებს მანქანაში.
ეს მტკიცებულებები ჯერ გამოკვლეული არ არის, მივყვეთ მტკიცებულებებს. ყველა მოწმე მხოლოდ ერთ რამეს ადასტურებს, რომ ოთარ აბესაძე მათგან მხოლოდ კონსულტაციას იღებდა, ნებართვა ბოლომდე არ იყო გაცემული. არცერთი მოწმე არ ადასტურებს, რომ ოთარ აბესაძემ ვინმეს სთხოვა გაცემულიყო ნებართვა", - აცხადებს ნონა ფილაური.
ცნობისთვის, მერიის ყოფილი თანამშრომელი, ოთარ აბესაძე თბილისის საქალაქო სასამართლომ 15 იანვარს, 10 000 ლარიანი გირაოს სანაცვლოდ გაათავისუფლა. აბესაძე ქრთამის აღების ბრალდებით სუს-მა გასული წლის 12 ივლისს დააკავა. გამოძიების თანახმად, აბესაძემ მდინარე მტკვარზე, გარკვეული კონსტრუქციის აშენებისთვის საჭირო ნებართვის მისაღებად და ნებართვის მიღებამდე მშენებლობის წარმოების მფარველობის სანაცვლოდ მოქალაქეს 3 ათასი დოლარი ქრთამის სახით გამოართვა.