ბრალდებას ჰყავს ერთი მოწმე - მოქალაქე, რომელიც აცხადებს რომ ოთარ აბესაძემ მას გამოართვა ქრთამი, - აცხადებს მერიის ყოფილი მაღალჩინოსნის, ოთარ აბესაძის საქმის პროკურორი, ირაკლი მარშანია.
მისი განმარტებით, დღეს დაკითხულმა ორმა მოწმემ,დაადასტურა, რომ მეგობრისთვის დახმარების აღმოსაჩენად ოთარ აბესაძე მათ დაუკავშირდა.
"დღეს, გარემოს ეროვნული სააგენტოს და არქიტექტურის სამსახურის ყოფილი თანამშრომლები დაიკითხნენ, რომლებმაც განაცხადეს, რომ თითქოს მეგობრის დახმარების აღმოჩენის მიზნით, მათ დაუკავშირდა ოთარ აბესაძე. შემდეგ პროცესებზე ამ ე.წ. მეგობარს დავკითხავთ, რომელიც დაადასტურებს რომ ოთარ აბესაძე მას რეალურად დაპირდა დახმარებას, რომლის სანაცვლოდაც, ქრთამის სახით გამოართვა ფული. დღევანდელი მოწმეების ჩვენებით, ასევე საქმეში არსებული მტკიცებულებები ერთობლიობაში ქმნის იმის საფუძველს, რომ ოთარ აბესაძეს ჩადენილი აქვს დანაშაული. ბრალდებას ჰყავს ერთი მოწმე,მოქალაქე, რომელიც აცხადებს რომ ოთარ აბესაძემ მას გამოართვა ქრთამი. აბესაძის დანაშაული არამხოლოდ ამ მოწმის ჩვენებით დასტურდება, არამედ გადაღებულია მათი შეხვედრები, ფარული აუდიო-ვიდეო ჩანაწერებია,სადაც ცალსახად ფიქსირდება, რომ ოთარ აბესაძემ მოქალაქეს ქრთამი გამოართვა. საქმეზე არსებული მტკიცებულებებიდან გამომდინარე, ბრალდების მხარეს მოლოდინი აქვს რომ სასამართლო, ერთადერთ, სწორ და სამართლიან გადაწყვეტილებას მიიღებს და ოთარ აბესაძეს დამნაშავედ ცნობს", - განაცხადა მარშანიამ.
შემდეგი სხდომა 29 მაისს, 10:30 საათზე ჩაინიშნა.
ცნობისთვის, მერიის ყოფილი თანამშრომელი, ოთარ აბესაძე თბილისის საქალაქო სასამართლომ 15 იანვარს, 10 000 ლარიანი გირაოს სანაცვლოდ გაათავისუფლა. აბესაძე ქრთამის აღების ბრალდებით სუს-მა გასული წლის 12 ივლისს დააკავა. გამოძიების თანახმად, აბესაძემ მდინარე მტკვარზე, გარკვეული კონსტრუქციის აშენებისთვის საჭირო ნებართვის მისაღებად და ნებართვის მიღებამდე მშენებლობის წარმოების მფარველობის სანაცვლოდ მოქალაქეს 3 ათასი დოლარი ქრთამის სახით გამოართვა.