მგონია, რომ ადამიანი, რომელიც მაგ ასაკში იმყოფება, ეთიკა და ზრდილობა უკვე შეძენილი უნდა ჰქონდეს, რაღა დროს კოდექსებით ცხოვრებაა, – ამის შესახებ საპარლამენტო უმრავლესობის წევრმა დავით ჭიჭინაძემ ქცევის კოდექსის მომზადების თაობაზე გუგული მაღრაძის ინიციატივასთან დაკავშირებით განაცხადა.
„პატარა ბავშვი რომ ვიყავი, მეუბნებოდნენ, მარცხენა ხელით არ ჭამო და კოვზი მარჯვენა ხელში დაიჭირე, უზრდელობააო. ასევე მასწავლეს, თავი თეფშში არ ჩაჰყოო. თუ ვინმეს პოლიტიკაში იმის გადმოტანა უნდა, პოლიტიკაში სად როგორ მოვიქცეთ – არ დავამთქნაროთ და კანონის მიღების დროს არ ჩაგვეძინოს, კი ბატონო", - განაცხადა ჭიჭინაძემ.
მან უმრავლესობის სხდომაზეც ისაუბრა და აღნიშნა, რომ სხდომის გადადების მიზეზი ვერ გაიგო.
"რაც შეეხება უმრავლესობის სხდომას, მას ველოდებოდით, გვეგონა იქნებოდა და რატომ გადაიდო, მიზეზი ვერ გავიგე. საკმარისი ხალხი ვიყავით, თუ ერთმანეთთან საუბარი გვინდოდა. მიზეზი ხალხის უკმარისობა ნამდვილად არ არის. ეს საკითხი სხდომის მოწვევა დღის წესრიგში რაც უფრო მალე დადგება, დაპირისპირება მით უფრო მალე დარეგულირდება. არ მგონია, ამის გაწელვა რომელიმე მხარეს აწყობდეს. სანქციებზე აღარ ლაპარაკობენ და ამას მიველსალმები. შევეცდები, რომ ყველანაირი კომენტარისგან თავი შევიკავო და მათ სრულ კარტბლანშს მივცემ, რადგან ჩემი პოზიცია ყველასთვის ცნობილია. აქედან გუშინაც სპეციალურად გავედი, რომ რამე არ მეთქვა. კოლეგებს შორის ერთმანეთის აზრის გაცვლა ხდებოდა, მაგრამ შედეგი ვერ მიიღეს. დაპირისპირების ყველა მონაწილე აქ ვართ, ვისაც საღი აზრი გააჩნია და მტყუან-მართალის გარჩევა შეუძლია. ჩვენი მოთხოვნაა, დეპუტატები უფრო მეტად იყვნენ წარმოდგენილი საპარლამენტო ცხოვრებაში. თქვენს რესპონდენტებს გადახედეთ, სულ ერთი და იგივე რესპონდენტები გყავთ. სხვა ადამიანების აზრი არ გაინტერესებთ? რაღაც შეზღუდვები არის, მაქსიმალურად ცდილობენ, ერთი აზრი იყოს და ყველას თავისი აზრი გააჩნია. ეს ადამიანები ტელევიზიით უფრო გავიცანი, ვიდრე საპარლამენტო ცხოვრებიდან. მათ ვგულისხმობ, ვინც ძალიან ხშირად გყავთ“, – აღნიშნა ჭიჭინაძემ.