ოკუპირებული ტერიტორიის პერიმეტრზე, სოფელ ფლავისმანის განაპირას ოკუპანტების მიერ დაკავებული ადგილობრივი მცხოვრები თამაზ ილურიძე გაათავისუფლეს.
თამაზ ილურიძე შიდა ქართლის სამხარეო პოლიციაში იმყოფება და მისი დაკავების შესახებ ინფორმაციას სამართალდამცავებს აწვდის.
მისი განცხადებით, ის საოკუპაციო ხაზიდან მოშორებით იმყოფებოდა, როდესაც მისი დაკავება მოხდა. მისივე თქმით, აღნიშნულ ტერიტორიაზე ხშირად გაჰყავდა პირუტყვი და ამ დრომდე მსგავსი პრობლემა არ შექმნია.
მისივე განცხადებით, ის ოკუპანტებმა იარაღის მუქარით დააკავეს და თავდაპირველად არცევში, მოგვიანებით კი, ცხინვალში გადაიყვანეს.
ცნობისთვის, ილურიძე გუშინ, იმ დროს დააკავეს, როცა პირუტყვს მწყემსავდა.