კანონპროექტის მიხედვით, არა მხოლოდ მკაცრდება სანქციები „ქურდული სამყაროს“ წევრებისა და „კანონიერი ქურდების“ მიმართ, არამედ პროექტი ე.წ. კრიმინალურ, „ქურდულ მენტალიტეტს“ შეურიგებელ ბრძოლას უცხადებს, - ამის შესახებ შს მინისტრის მოადგილე ნათია მეზვრიშვილმა განაცხადა.
მისი გამარტებით, ახალი პროექტი ბრძოლას უცხადებს იმ მენტალიტეტს, რომელიც არის მომავლის, ახალგაზრდების პრობლემა და შემაფერხებელია როგორც ეკონომიკური განვითარების, ასევე ზოგადად ქვეყნის განვითარებისთვის.
მისივე თქმით, როგორც კი კანონპროექტს ხელი მოეწერება, „ქურდული სამყაროსა“ და „კანონიერი ქურდებისთვის“ დავის მოგვარებისთვის ნებისმიერი არასამართლებრივი გზით მიმართვა, ასევე ამ ადამიანების ნებისმიერი ფორმით მხარდაჭერა სისხლის სამართლის დანაშაული იქნება და ამ პირებს სისხლის სამართლის პასუხისმგებლობა დაეკისრებათ.
„კანონპროქტი მნიშვნელოვანია არა მხოლოდ იმიტომ, რომ „კანონიერ ქურდებს“ სჯის, არამედ ნებისმიერ იმ პირსაც, რომელიც „ქურდი“ არ არის, მაგრამ მისი საქმიანობა „ქურდული სამყაროს“ მიზნებს ემსახურება. ჩვეულებრივ პირს სისხლის სამართლის პასუხისმგებლობა დაეკისრება, რომელიც „კანონიერ ქურდს“ მიმართავს და დავის გადაწყვეტას სთხოვს, რაც წესით, სასამართლოს ან სამართალდამცავი ორგანოების მიერ უნდა გადაწყდეს”, – განაცხადა ნათია მეზვრიშვილმა.
ცნობისთვის, პარლამენტი დღევანდელ პლენარულ სხდომაზე „ქურდულ სამყაროსთან“ დაკავშირებით მომზადებულ საკანონმდებლო პაკეტს მესამე მოსმენით დაამტკიცებს.
