დღეს ევროპის საბჭოს მინისტრთა მოადგილეების კომიტეტი განიხილავს გენერალური მდივნის მე-17 კონსოლიდირებულ ანგარიშს. ეს არის კარგი შესაძლებლობა იმისთვის, რომ ევროპის საბჭოს დღის წესრიგში ჩვენ წელიწადში ორჯერ გვაქვს შესაძლებლობა განვიხილოთ ოკუპირებულ ტერიტორიებზე შექმნილი სიტუაცია, ბუნებრივია ამ ფორმატს გამოვიყენებთ იმისთვის, რომ საერთაშორისო თანამეგობრობას მივაწოდოთ ამომწურავი ინფორმაცია ადამიანის უფლებათა შეზღუდვის კუთხით შექმნილ მძიმე მდგომარეობაზე, - განაცხადა საქართველოს საგარეო საქმეთა მინისტრის პირველმა მოადგილემ დავით ზალკალიანმა, რომელიც ანგარიშის განხილვას დაესწრება.
დღეს, ევროპის საბჭოს მინისტრთა მოადგილეების კომიტეტის 1314-ე სხდომაზე განიხილება ევროპის საბჭოს გენერალური მდივნის ტორბიორნ იაგლანდის მე-17 კონსოლიდირებული ანგარიში - "კონფლიქტი საქართველოში", რომელიც მოიცავს პერიოდს 2017 წლის ოქტომბრიდან 2018 წლის მარტის ჩათვლით.
დავით ზალკალიანის განცხადებით კონსოლიდირებულ ანგარიშში საუბარია ეთნიკურ ნიადაგზე ქართული მოსახლეობის დისკრიმინაციის ფაქტებზე და ბოლო პერიოდის ტრაგიკულ მოვლენებზე.
„ანგარიშში საუბარია თუ როგორ ეზღუდება ქართულ მოსახლეობას ფუნდამენტური უფლებები, ასევე საუბარი არის ბოლო პერიოდის ტრაგიკულ მოვლენებზე, კერძოდ ტატუნაშვილის მკვლელობის ფაქტზე, ასევე გამახვილებულია ყურადღება ოთხოზორიას მკვლელობის დაუსჯელობის თემაზე. ბუნებრივია, ჩვენ საერთაშორისო თანამეგობრობის მხრიდან გვექნება ადეკვატური შეფასება ამ მკვლელობის ფაქტთან დაკავშირებით, ასევე გვაქვს მოლოდინი, რომ იქნება სათანადოდ შეფასებული ის ე.წ. შეთანხმებები, რომელიც რუსეთის ფედერაციის მხრიდან იდება ოკუპირებულ ტერიტორიებთან მიმართებაში", - აღნიშნა დავით ზალკალიანმა.
პირველი მოადგილის განცხადებით ანგარიშში ასევე საუბარია საერთაშორისო თანამეგობრობის საქართველოს ოკუპირებულ ტერიტორიებზე დაშვების საკითხებზე - „ასევე მნიშვნელოვანია აღინიშნოს, რომ კონსოლიდირებულ ანგარიშში იქნება საუბარი საერთაშორისო თანამეგობრობის წვდომაზე, რომ სამწუხაროდ საერთაშორისო თანამეგობრობას არ ეძლევა შესაძლებლობა, რომ შევიდეს ამ ტერიტორიებზე და მოხდეს იქ არსებული სიტუაციის შეფასება", - აღნიშნა დავით ზალკალიანმა.
როგორც მინისტრის პირველმა მოადგილემ აღნიშნა ქართული მხარე ევროპის საბჭოს მინისტრთა მოადგილეების კომიტეტის სხდომას მიაწოდებს ინფორმაციას საქართველოს ხელისუფლების ბოლო ინიციატივებზე, კერძოდ, გააცნობს ინიციატივას „ნაბიჯი უკეთესი მომავლისაკენ", რომელიც ითვალისწინებს ოკუპირებული ტერიტორიების ჩართულობას.