"მოწმე ადასტურებს იმ ფაქტს, რომ ახმედ ჩატაევს ჯერ კიდევ, საქართველოში უკანონოდ შემოსვლამდე ჰქონდა მცდელობა ხელისუფლებაზე უკანონო გავლენა მოეხდინა. მისი მოთხოვნის დაუკმაყოფილებლობის შემთხვევაში, ის საქართველოს ხელისუფლებას ემუქრებოდა", - განაცხადა ჟურნალისტებთან ტერორისტების და ტერორისტული ორგანიზაციისთვის მხარდაჭერაში ბრალდებულების საქმის პროკურორმა, ნანა ხუნჯუამ.
დღეს დაცვის მხარემ შესავალი სიტყვა წარმოთქვა.
"დაცვის მხარის შესავალი სიტყვები მოვისმინეთ და ბრალდების მტკიცებულებების გამოკვლევაზე გადავედით. დღევანდელ სასამართლო პროცესზე დავკითხეთ ერთი მოწმე, რომლის სახელს და გვარსაც ვერ დავასახელებთ. თუმცა, შემიძლია გითხრათ, რომ აღნიშნული მოწმე ადასტურებს იმ ფაქტს, რომ ახმეტ ჩატაევს ჯერ კიდევ საქართველოში უკანონოდ შემოსვლამდე ჰქონდა მცდელობა ხელისუფლებაზე უკანონო გავლენა მოეხდინა. მისი მოთხოვნის დაუკმაყოფილებლობის შემთხვევაში, ის საქართველოს ხელისუფლებას ემუქრებოდა",- აცხადებს ხუნჯუა.
მისი განმარტებით, ჩატაევმა მოწმეა რამდენიმე ხმოვანი შეტყობინება გაუგზავნა, რომლის ძალოვან უწყებამდე მიტანასაც სთხოვდა.
"აღნიშნულ მოწმეს ჩატაევმა ხმოვანი შეტყობინება გამოუგზავნა და აღნიშნული შეტყობინების შსს-ს მაღალჩინოსნებთან მიტანა დაავალა, რაც მოწმემ განახორციელა კიდეც. შესაბამისად, გამოძიების მიერ მოპოვებულია ეს შეტყობინებები. ჩატაევის მოთხოვნა იყო, აიუფ ბორჩაშვილის და მასთან ერთად დაკავებული პირების გათავისუფლება, რომლებიც ასევე ტერორიზმთან დაკავშირებული დანაშაულისთვის არიან გასამართლებულები. ის ხელისუფლებას ერთკვირიან ვადას აძლევდა, წინააღმდეგ შემთხვევაში, ის მუქარას აღასრულებდა. ეს შეტყობინება სპეცოპერაციის მოვლენებს დაახლოებით, წელიწადით წინ უსწრებდა. მუქარაში საუბარი იყო საქართველოს მოქალაქეების და საქართველოში ტურისტების უსაფრთხოებაზე", - აცხადებს პროკურორი.
შემდეგი სხდომა, 18 აპრილს,12:00 საათზე ჩაინიშნა.
ცნობისთვის, სუს-ის მიერ ჩატარებული სპეცოპერაციის შედეგად დაკავებული 6 პირიდან, 4- ს ბრალი ტერორისტებისთვის ხელშეწყობაში, ხოლო 2 პირს, ტერორისტული ორგანიზაციის წევრობაში ედება ბრალი, ერთ-ერთს, ასევე ბრალი ედება საქართველოში.