ქართული სახელმწიფოს სიმსივნე რომ ციხეში შერეკეს, ეს მახარებს, - ასე ეხმაურება "რუსთავი 2"-ის გენერალური დირექტორი ნიკა გვარამია „ქართული მარშის“ წევრებისთვის აღკვეთის ღონისძიების სახით პატიმრობის შეფარდებას.
როგორც გვარამია Facebook-ის პირად გვერდზე წერს, ეს მისასალმებელია და აღსანიშნავი.
"უნდა აღინიშნოს, რომ ქართული სახელმწიფოს სიმსივნე რომ ციხეში შერეკეს, ეს მახარებს და თან სასიამოვნოდ გაკვირვებულიც ვარ. ფაქტია, რომ ის სამთავრობო კლანი, რომელიც ამ ახვრებს ანგარიშსწორებისთვის იყენებდა, დაისაჯა.
მისასალმებელია და აღსანიშნავი!", - წერს გვარამია.
ცნობისთვის, ე.წ. „ქართული მარშის“ ექვსივე დაკავებულ წევრს სასამართლომ აღკვეთის ღონისძიების სახით პატიმრობა შეუფარდა.
მოსამართლე დავით კურტანიძემ „ქართული მარშის“ წევრებს - გიორგი ონიანს, ლუკა ნაცვლიშვილს, მიხეილ ამისულაშვილს, ლადო სადღობელაშვილს, ირაკლი დოლენჯაშვილს და ბექა რევაზიშვილს აღკვეთის ღონისძიების სახით პატიმრობა განუსაზღვრა.
ექვსივე ბრალდებული პირი მანდატურის სამსახურმა სხდომათა დარბაზიდანვე გადაიყვანა შესაბამის დაწესებულებაში.