დღეს გაიმართა სახელმწიფო აუდიტის სამსახურის 2017 წლის ფინანსური აუდიტის განმახორციელებელი საქართველოს პარლამენტის დროებითი კომისიის მორიგი სხდომა, რომელსაც კომისიის თავმჯდომარე, პარლამენტის საფინანსო-საბიუჯეტო კომიტეტის თავმჯდომარის პირველი მოადგილე პაატა კვიჟინაძე უძღვებოდა.
კომისიის თავმჯდომარემ კომისიის წევრებს წარუდგინა აუდიტორთა გუნდი, რომელიც სახელმწიფო აუდიტის სამსახურის 2017 წლის ფინანსურ აუდიტს განახორციელებს. კომისიის სამუშაო ჯგუფის შემადგენლობაში არიან აუდიტორული კომპანია „ნექსია თიეი“-ს წარმომადგენლები გელა მღებრიშვილი, ბორის მეგრელიშვილი და დავით ბოლქვაძე.
პაატა კვიჟინაძის განცხადებით, აღნიშნული გუნდი მათი გამოცდილების და მაღალი კვალიფიკაციის გათვალისწინებით შეირჩა. პარლამენტის დროებითი კომისია სამი თვის ვადითაა შექმნილი და კომისიის თავმჯდომარემ იმედი გამოთქვა, რომ კომისია განსაზღვრულ ვადაში დაასრულებს მუშაობას.
კომისიამ ასევე განსაზღვრა სახელმწიფო აუდიტის სამსახურის 2017 წლის ფინანსური აუდიტის განმახორციელებელი საქართველოს პარლამენტის დროებითი კომისიის სამუშაო ჯგუფის შემოწმების პროგრამა. შემოწმება სამი მიმართულებით განხორციელდება:
- სახელმწიფო აუდიტის სამსახურის ფინანსური ანგარიშისა და ანგარიშგების შემოწმება, შეფასება, აუდიტის ანგარიშის გაცემა;
- სახელმწიფო აუდიტის სამსახურის ფინანსური საქმიანობისა და ფინანსური სისტემების საქართველოს კანონმდებლობასთან შესაბამისობის შემოწმება;
- სახელმწიფო აუდიტის სამსახურის შიდა კონტროლისა და შიდა აუდიტის ფუნქციის შემოწმება.
