„გამოძიებაზე მეკოს მხრიდან არანაირ ზეწოლას ადგილი არ ჰქონია. ჩემთვის გაუგებარია, როგორ შეიძლება მეკომ გამოძიებაზე ზეგავლენა მოახდინოს?“, - ასე პასუხობს „ჯი-ეიჩ-ენთან“ მორაგბე მერაბ, იგივე მეკო კვირიკაშვილის ადვოკატი, ნუკრი კვინიკაძე გავრცელებულ აზრს, რომ კვირიკაშვილი თავისი სტატუსიდან გამომდინარე შესაძლოა გამოძიებაზე ზეგავლენას ახდენდეს.
კვირიკაშვილის პროცესი ქუთაისის საქალაქო სასამართლოში დღეს, 14:00 საათზე განახლდება. დღევანდელ პროცესზე ბრალდების მხარის მოწმეები დაიკითხებიან. სხდომას კვირიკაშვილიც დაესწრება.
როგორც „ჯი-ეიჩ-ენთან“ მორაგბის ადვოკატი, ნუკრი კვინიკაძე აცხადებს, ექსპერტიზის შედეგებით ავტოსაგზაო შემთხვევაში მისი დაცვის ქვეშ მყოფის ბრალეულობა არ იკვეთება.
„ეს არის ავტოსაგზაო შემთხვევა, რომელზეც ჩატარდა ექსპერტიზები. ექპერტიზებით, საქმის მასალებით, დგინდება, რომ აღნიშნულ ავტოსაგზაო შემთხვევაში მეკო კვირიკაშვილს ბრალი არ მიუძღვის. მიმაჩნია, რომ სასამართლო მის მიმართ გამამართლებელ განაჩენს გამოიტანს“, - აღნიშნავს ადვოკატი.
შეგახსენებთ, რომ გასული წლის 21 ივლისს, სამტრედია-ქუთაისის შემოვლით გზაზე ავტოსაგზაო შემთხვევა მოხდა. ერთმანეთს, „იქს 5“ და „ჰონდას“ მარკის ავტომანქანები შეეჯახნენ. ავარიის შედეგად, დაიღუპა მორაგბე მეკო კვირიკაშვილის მეუღლე, ანანო ბუაძე, „ჰონდას“ მგზავრები, გიორგი პაპასკირი, ნუცა კალანდია და ანი ჩხაიძე. მძიმედ დაშავდნენ, თავად მეკო კვირიკაშვილი, ასევე მორაგბე გიორგი ლომინაძე და ნუცა გუნცაძე.
გამამტყუნებელი განაჩენის შემთხვევაში, მეკო კვირიკაშვილს სასჯელის სახით 6-დან 10 წლამდე თავისუფლების აღკვეთა ემუქრება.