საერთაშორისო ინვესტორები საქართველოს მთავრობისგან ევროობლიგაციების გამოშვებას ითხოვენ, აღნიშნულის შესახებ ინფორმაცია BGEO ჯგუფის გენერალურმა დირექტორმა ირაკლი გილაურმა გააჟღერა, შეხვედრაზე, რომელსაც ქვეყნის პრემიერ-მინისტრი გიორგი კვირიკაშვილი და პირველი ვიცე-პრემიერი დიმიტრი ქუმსიშვილი ესწრებოდა.
ირაკლი გილაურმა საქართველოს მთავრობის ლიდერებს ინვესტორების მოთხოვნები საჯაროდ, "საქართველოს კაპიტალის" ღონისძიებაზე გააცნო, სადაც საინვესტიციო კომპანიამ მომდევნო წლებში 500 მლნ დოლარის კაპიტალი მოზიდვის გეგმები გააჟღერა.
"80-ზე მეტ ინვესტორს შევხვდით ევროობლიგაციების გამოშვების როუდშოზე ინგლისში, აშშ-ში, ევროპაში. დაინტერესება საქართველოსადმი ძალიან დიდია. მოგეხსენებათ საქართველოს რეფორმირება საკმაოდ კარგად მიმდინარეობს. საქართველოს ეკონომიკის ზრდა საკმაოდ დიდია. წარმატებას მიაღწია საქართველომ ბევრი მიმართულებით, როგორც ბიზნესის კეთების სიმარტივით, აგრეთვე გადასახადების შემცირებით. ძალიან დიდი წვლილი მოუძღვის ამ რეფორმას ინვესტორების დაინტერესებაში. ინვესტორები რა თქმა უნდა ჯერ საქართველოში დებენ ფულს და მერე „საქართველოს კაპიტალში“. შესაბამისად ჩვენ ძალიან დიდი ინტერესი დავინახეთ ინვესტორების მხრიდან. მართალი, რომ გითხრათ მათ ერთ თხოვნა აქვთ, რომ იქნებ საქართველოს მთავრობამ გამოუშვას ევროობლიგაციები. მეხვეწებოდნენ და მე ვუთხარი, რომ გადავცემდი და ახლა საშუალება მეძლევა, რომ ეს გითხრათ“, - მიმართა ირაკლი გილაურმა გიორგი კვირიკაშვილსა და დიმიტრი ქუმსიშვილს.
