არასახელმწიფო კომპანიამ, პირველად განათავსა ობლიგაციები ევრობონდების სახით და მოიზიდა 300 მილიონი დოლარი, - ამის შესახებ პრემიერ-მინისტრმა გიორგი კვირკაშვილმა "საქართველო კაპიტალის" მიერ გამართულ ღონისძიებაზე განაცხადა.
მან "საქართველოს კაპიტალს" 300 მლნ აშშ დოლარის ღირებულების ევროობლიგაციების განთავსებას ძალიან შთამბეჭდავი სტარტი უწოდა.
"ძალიან სასიხარულოა, რომ 300 მლნ დოლარის ახალი ინვესტიცია შემოვა ქვეყანაში და განთავსება ისეთ სტრატეგიულად მნიშვნელოვან სფეროებში, როგორიცაა ტურიზმი, ენერგეტიკა, უძრავი ქონება. ნამდვილად მისასალმებელია, რომ არასაფინანსო, არასახელმწიფო კომპანიამ, პირველად განათავსა ობლიგაციები ევრობონდების სახით და მოიზიდა 300 მილიონი დოლარი", - განაცხადა კვირიკაშვილმა.
პრემიერ-მინისტრი ასევე გამოეხმაურა სტატისტიკის ეროვნული სამსახურის მიერ 2017 წლის პირდაპირი უცხოური ინვესტიციების შესახებ გავრცელებულ ინფორმაციას და აღნიშნა, რომ 2016 წელთან შედარებით ზრდა 16.2%-ია.
პრემიერია განცხადებით, განსაკუთრებით სასიხარულოა ის, რომ 130%-ზე მეტით გაიზარდა რეინვესტიცია, ეს არის დაახლოებით, 712 მილიონი დოლარი რეინვესტირებული, ანუ ბიზნესიდან ჩაბრუნებული თანხა ჩვენს ქვეყანაში.
"ეს არის თანხა, რომელიც როგორც წესი გადიოდა ქვეყნის გარეთ, რომ არ ყოფილიყო 2 რამ. ერთი - მზარდი ეკონომიკა და 4.8% ეკონომიკური ზრდა და მეორე - მოგების გადასახადის რეფორმა, რომელიც 2017 წლის 1-ლი იანვრიდან განვახორციელეთ. ეს ყველაფერი ერთმანეთთან კავშირშია. დარწმუნებული ვარ, რომ ეს რეფორმა თავის შედეგებს 2018 წელსაც მოიტანს და კიდევ ძალიან დიდი ხნის განმავლობაში. მთლიანობაში მინდა ვთქვა, რომ ეკონომიკური დინამიკა არის ძალიან სახარბიელო. ტურიზმის მიმართულებით გვაქვს მართლაც სასარგებლო ბიზნესისთვის ზრდა", - აღნიშნა კვირიკაშვილმა.