BGEO Group -ის საინვესტიციო ბიზნეს ჰოლდინგი „საქართველოს კაპიტალი“ ქვეყანაში 500 მილიონი დოლარის დაბანდების გეგმაზე აცხადებს.
თანხის ნაწილი, 300 მლნ დოლარი კომპანიამ ევროობლიგაციების წარმატებული განთავსებით უკვე მოიზიდა. 200 მილიონი აქციონერთა კაპიტალით დაფინანსდება.
თანხები მიმართული იქნება სხვადასხვა სექტორში, მათ შორის ტურიზმში. ამ მიმართულებით, მომდევნო 2 წლის განმავლობაში კომპანიის შვილობილი M2 - უძრავი ქონება 10 სასტუმროს ააშენებს. სასტუმროები აშენდება თბილისში, ქუთაისში, კახეთში და სამთო-სათხილამურო კურორტებზე. ამავე კომპანიის მიერ დაგეგმილია რამდენიმე საცხოვრებელი უბნის მშენებლობა.
ინვესტიციები განხორციელდება ქართული მეღვინეობის განსავითარებლად. გაფართოვდება ღვინის წარმოება, რათა დაკმაყოფილდეს ექსპორტზე გაზრდილი მოთხოვნა, განსაკუთრებით ჩინეთის მიმართულებით.
საინვესტიციო აქტივობა განხორციელდება ენერგო ბიზნესშიც. მათ შორის დაგეგმილია ახალი ჰესების მშენებლობა, რაშიც 119 მლნ დოლარი ჩაიდება.
შეგახსენებთ, "საქართველოს კაპიტალი"-ი მოიცავს: 57% -ს "საქართველოს ჯანდაცვის ჯგუფში" (GHG), 100% კომპანია "ჯორჯია გლობალ იუთილითიზში" (GGU), 100%-ს კომპანია "m2 უძრავი ქონებაში", 76% წილს "თელიანი ველი"-ში, 100%-ს სადაზღვევო კომპანია "ალდაგში" და 19.9% წილს საქართველოს ბანკის ჯგუფში.