„სითი პარკის” საქმეში პოლიტიკური კონტექსტი გამორიცხულია, - ამის შესახებ საქართველოს საგარეო საქმეთა მინისტრმა მიხეილ ჯანელიძემ განაცხადა.
მისი თქმით, დავის არსებობის შემთხვევაში საქართველოს მთავრობა კანონის და შეთანხმების ფარგლებში იმოქმედებს.
„მოგეხსენებათ, რომ 2012 წელთან შედარებით, 2017 წელს საქართველომ კერძო საკუთრების დაცვის კუთხით 74 პოზიციით გაიუმჯობესა ადგილი, რაც ქვეყნისთვის ძალიან მნიშვნელოვანია. ასევე მნიშვნელოვანია თითოეული უცხოელი ინვესტორი და კომპანია, რომელიც საქართველოში სახელშეკრულებო ვალდებულების და კანონმდებლობის მიხედვით მოღვაწეობს. თუ არსებობს დავა, ეს გადაწყდება კანონის, შეთანხმების და ხელშეკრულების შესაბამისად. ხაზგასმით მინდა აღვნიშნო, რომ ამ საქმეში პოლიტიკური კონტექსტი გამორიცხულია”,- განაცხადა მიხეილ ჯანელიძემ.
ცნობისთვის, დღეს „სითი პარკის“ მფლობელებმა განცხადება გაავრცელეს, სადაც აღნიშნავენ, რომ თბილისის მერიის გადაწყვეტილება მაგალითია იმისა, თუ როგორ ეპყრობა ხელისუფლება უცხოელ ინვესტორებს.