ამ წუთებში უზენაეს სასამართლოში ხორავას ქუჩაზე მოზარდებს შორის მომხდარი მკვლელობის საქმის განხილვა მიმდინარეობს. პროცესი ბრალდების მხარის მოწმეების დაკითხვით დაიწყო.
როგორც ცნობილია, დღევანდელ სხდომაზე ორი არასრულწლოვანი დაიკითხება.
როგორც ჟურნალისტებთან საუბარში ერთ-ერთი ბრალდებულის ადვოკატი, ტარიელ კაკაბაძე აცხადებს, მათთვის ბრალდების მხარეს ნივთმტკიცებები კვლავ არ გადაუცია.
"დაცვის მხარეს საკმაოდ ბევრი ექსპერტიზა გვაქვს დანიშნული, რომელიც საქმეზე უტყუარი ჭეშმარიტების დასადგენად აუცილებელია, ის ყველა იმ კითხვაზე გასცემს პასუხს რომელიც საზოგადოებას აწუხებს. ბრალდების მხარეს ისევ არ გადმოუცია ის ნივთმტკიცებები რომელზეც ექსპერტიზა უნდა ჩატარდეს", - განაცხადა კაკაბაძემ.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.