"იუსტიციის საბჭო დამოუკიდებელი უნდა იყოს, მის გადაწყვეტილებაში ვერავინ ერეოდეს, მაგრამ ეს იმას არ ნიშნავს, რომ თავად საბჭოს საზოგადოების წინაშე ანგარიშვალდებულება არ ჰქონდეს", - ამის შესახებ "ქართული ოცნების" წევრმა, პარლამენტის იურიდიულ საკითხთა კომიტეტის თავმჯდომარემ, ეკა ბესელიამ განაცხადა.
ის გამოეხმაურა პრემიერის განცხადებას, რომ რამდენიმე მოსამართლესთან დაკავშირებით მიღებულმა გადაწყვეტილებამ საზოგადოებაში გააჩინა კითხვები და ეს კითხვები არის მმართველ გუნდშიც.
როგორც ბესელიამ აღნიშნა, მთავრობის მეთაურმა ძალიან საყურადღებო და მნიშვნელოვანი განცხადება გააკეთა.
„დემოკრატიულ ფასეულობებსა და ინსტიტუტების დამოუკიდებლობას პატივს ვცემთ. ამიტომ, ერთმნიშვნელოვანია, რომ იუსტიციის საბჭო, რომელიც სასამართლო ხელისუფლების რგოლია, თავის გადაწყვეტილებებში დამოუკიდებელი იყოს. ამ გადაწყვეტილებებში ჩარევის უფლება არ გვაქვს და ჩვენი მანდატი უფლებამოსილების მხოლოდ იმ ეტაპზე შემოიფარგლება, როდესაც გადაწყვეტილებას ვიღებთ, პარლამენტის მხრიდან ვინ შეიძლება არჩეული იყოს, მაგრამ არჩეული პირები რა გადაწყვეტილებას იღებენ, ამ გადაწყვეტილების მიღებაში პარლამენტი ვერ ჩაერევა.
ბუნებრივია, კითხვები გუნდის შიგნითაც არის, მაგრამ იუსტიციის საბჭო დამოუკიდებელი უნდა იყოს და ამაში არავინ და ვერავინ ჩაერევა, მაგრამ ეს იმას არ ნიშნავს, რომ თავად საბჭოს საზოგადოების წინაშე ანგარიშვალდებულება არ ჰქონდეს. როცა კონკრეტულ გადაწყვეტილებაზე კითხვები ჩნდება, საბჭომ უნდა უპასუხოს, ეს გადაწყვეტილება რატომ იყო მიღებული. ამ გადაწყვეტილებებს დასაბუთება სჭირდება.
თუკი ეს გადაწყვეტილებები ისეთ მოსამართლეებს უკავშირდება, რომელთაც წარსულში ისეთი განაჩენები ჰქონდათ გამოტანილი, რომლის მიმართაც კრიტიკა იყო და პარლამენტს აქვს ნათქვამი, რომ ეს პოლიტიკურად მოტივირებული გადაწყვეტილებები იყო, ბუნებრივია, კითხვები გაჩნდება და ასეთ კითხვებს თავად იუსტიციის საბჭოს წევრებმა უნდა უპასუხონ, რადგან ჩვენ ვერ ვუპასუხებთ. უვადოდ ვინ გამწესდება და ვინ არა, ამაში ჩართული არ ვართ და ვერ ვიქნებით, მაგრამ კითხვები ჩნდება, რომელიც ლეგიტიმურია", - განაცხადა ბესელიამ და დასძინა, რომ გაჩენილ კითხვებზე პასუხები იუსტიციის საბჭოს წევრებმა უნდა გასცენ.
"საკმაოდ ბევრი შემთხვევა იყო, რომელსაც ვაპროტესტებდით და ვამბობდით, რომ პოლიტიკური გადაწყვეტილებები იყო მიღებული, გადაწყვეტილებებში ჩარევით ვერ ჩავერევით, მაგრამ როცა კითხვები ისმევა, ამას იუსტიციის საბჭომ უნდა უპასუხოს. ეს ჩვენთვის ძალიან მგრძნობიარე თემაა, რადგან თავისუფლება, დამოუკიდებლობა, სამართლიანობა და ფუნდამენტური ღირებულებები ყველაზე მაღალი ღირებულებებია. როცა ამ კუთხით კითხვები ისმევა, მათ შორის კითხვები პოლიტიკური გუნდის მიმართაც ისმევა და ამ დროს კითხვებს ვერ ვუპასუხებთ, რადგან ამ კითხვების ადრესატი თავად საბჭოა“, – განმარტა ბესელიამ.
ცნობისთვის, მოსამართლეების უვადოდ გამწესებაზე იუსტიციის უმაღლეს საბჭოში კენჭისყრა გუშინ ჩატარდა. წარდგენილი 50 კანდიდატიდან 6-ს უარი ეთქვა უვადო მოსამართლეობაზე, ხოლო შერჩეული 44 კანდიდატიდან 6 მოსამართლეს საბჭოს ყველა 15-ივე წევრმა დაუჭირა მხარი.