ვენაში, 26 თებერვალს, რუსეთსა და საქართველოს შორის ღია ცის შეთანხმების განხილვა გაიმართება. „რია ნოვოსტი“ სამხედრო-დიპლომატიურწყაროზე დაყრდნობით აცხადებს, რომ შეთანხმება ჩაშლის საფრთხის წინაშეა.
,,საქართველოს უკან დგას აშშ, ასევე, კანადა და ევროპული ქვეყნების ნაწილი: ბალტიისპირეთის ქვეყნები, პოლონეთი, რუმინეთი და უკრაინა. იმ შემთხვევაში, თუ 26 თებერვალს ვენაში ღია ცის საკონსულტაციო კომისიის სხდომაზე მხარეები შეთანხმებას ვერ მიაღწევენ, ამის შესაძლებლობა მარტში, მოლაპარაკებების სესიის დახურვის წინ იქნება”, - წერს რუსული გამოცემა.
დეკემბრის ბოლოს, “რია ნოვოსტის“ სამხედრო-დიპლომატიურმა წყარომ განუცხადა, რომ ღია ცის შეთანხმების ფარგლებში, სადამკვირვებლო ფრენები შესაძლოა შეწყდეს, რადგან საქართველოს არ სურს რუსულ თვითმფრინავებს თავისი საჰაერო სივრცე გაუხსნას.
ღია ცის შეთანხმებას ეუთო-ს წევრმა 23-მა სახელმწიფომ 1992 წლის 24 მარტს ჰელსინკიში მოაწერა ხელი. შეთანხმების მონაწილეებს შეუძლიათ ერთმანეთის ტერიტორიაზე სამხედრო აქტიურობის კონტროლის მიზნით, სამეთვალყურეო ფრენები განახორციელონ.