კიევის ექვსი მეტროსადგურიდან ევაკუაცია განხორციელდა. „უნივერსიტეტის“, „თეატრალურის“, „ხრეშატიკის“, „დამოუკიდებლობის მოედნის“, „ლევ ტოლსტოის“ და „ზალატიე ვაროტას“ მეტროსადგურები დახურულია. ადგილობრივი მედიის ცნობით, პოლიცია ექვსი მეტროსადგურის დანაღმვის შესახებ ინფორმაციას ამოწმებს.
პოლიციაში ამბობენ, რომ ადგილზე უკვე იმყოფებიან გამნაღმველები და კინოლოგები. როდემდე შენარჩუნდება შეზღუდვა, ჯერ უცნობია.
კიევში, პეტრო პოროშენკოს იმპიჩმენტის მოთხოვნით ოპოზიციის მომხრეთა მარში მიმდინარეობს. აქციის მონაწილეები საქართველოს ექს-პრეზიდენტის ქვეყნიდან გაძევებასაც აპროტესტებენ.
მარშის გამო, ადგილობრივი მედიის ცნობით, კიევის ცენტრისკენ მისასვლელი რამდენიმე მეტროსადგური ჩაკეტილია.