„სასჯელაღსრულების სამინისტროს ვერსიის შემდეგ, მომხდარი კიდევ უფრო ბუნდოვანია. თუ მაღალი რისკის პატიმარი იყო, უსაფრთხოების წესების შესაბამისად, მას იმ საგანზე წვდომა, რითიც დაზიანებას მიიყენებდა, არ უნდა ჰქონოდა“, - განუცხადა „ჯი-ეიჩ-ენს“ გლდანის სასჯელაღსრულების მე-8 დაწესებულებაში დაჭრილი პატიმრის, ნიკოლოზ ჩოფიკაშვილის ადვოკატმა, არჩილ ჩოფიკაშვილმა.
სასჯელაღსრულებისა და პრობაციის სამინისტროს განცხადებით, პატიმარმა პენიტენციურ დაწესებულებაში ყოფნის პერიოდში წარსულშიც სამჯერ მიიყენა თვითდაზიანება, სამივე ფაქტზე მოხდა მისი გამოკითხვა, რის შედეგადაც, მსჯავრდებულის თქმით დადგინდა, რომ თვითდაზიანებები მან სულიერი აშლილობის ნიადაგზე ყოველგვარი საპროტესტო მოთხოვნების გარეშე მიიყენა.
სწორედ, ამ ფაქტიდან გამომდინარე, ჩოფიკაშვილის ადვოკატისთვის გაუგებარია, თუ რატომ მიუწვდებოდა პატიმარს ისეთ საგანზე ხელი, რითიც თვითდაზიანებების მიყენებას შეძლებდა.
„უსაფრთხოების ზომების შესაბამისად და იმ წესების გათვალისწინებით, რომლითაც სასჯელარსრულების დაწესებულება იმართება, მაღალი რისკის პატიმარი, განსაკუთრებულ რეჟიმში უნდა იმყოფებოდეს და მას არანაირად არ უნდა ჰქონდეს ისეთ ნივთზე წვდომა, რომლითაც პოტენციურად შესაძლებელია ასეთი ტიპის, თუნდაც, თვითდაზიანების მიყენება. ამიტომ, სასჯელაღსრულების სამინისტრომ უნდა ახსნას, ასეთ პატიმარს რატომ მიუწვდებოდა ხელი ისეთ ნივთზე, რომლითაც ასეთი ტიპის დაზიანების მიყენებას შეძლებდა“, - აცხადებს ჩოფიკაშვილი.
ადვოკატისთვის თვითმკვლელობის მცდელობა არადამაჯერებელია კიდევ ერთი გარემოების გამო, შემთხვევის ადგილიდან ამოღებული არ არის საგანი, რითიც მსჯავრდებულს დაზიანებები აქვს მიყენებული.
„ადგილზე არ და ვერ იქნა ნანახი საგანი, რომლითაც ჩემი დაცვის ქვეშ მყოფს დაზიანება აქვს მიყენებული. ბუნებრივია, თვითმკვლელობის მცდელობის შემთხვევაში, საგანი, რომლითაც ეს დაზიანება განხორციელდა, ადგილზე უნდა ყოფილიყო ნანახი. ამ ყველაფრის ფონაზე, დამაჯერებლად ვერ გამოიყურება ვერსია, რომ პატიმარმა თვითმკვლელობა სცადა“, - აცხადებს ჩოფიკაშვილი.
საქმის მასალები და ის, თუ რას აცხადებენ თვითმიხლველი პატიმრები, ადვოკატისთვის ცნობილი არ არის.
შეგახსენებთ, რომ პატიმარი, ნიკოლოზ ჩოფიკაშვილი გლდანში, სასჯელაღსრულების მე-8 დაწესებულების საპირფარეოში 10 თებერვალს, ყელის არეში მიყენებული ჭრილობებით პატიმრებმა იპოვეს. ის ღუდუშაურის კლინიაკშია მოთავსებული. მისი მდგომარეობა კრიტიკულია.
