„პატიმრის ოჯახისთვის ცნობილი გახდა, რომ საკმაოდ უიმედო ვითარებაა, თავის ტვინისა და თირკმელების ფუნქციონირება გათიშულია, გადაჭრილი აქვს საუღლე ვენა და საძილე არტერია“, - განუცხადა „ჯი-ეიჩ-ენს“ პატიმრის, ნიკოლოზ ჩოფიკაშვილის ადვოკატმა, არჩილ ჩოფიკაშვილმა.
ჩოფიკაშვილი გლდანში, სასჯელაღსრულების მე-8 დაწესებულებაში 3 წელზე მეტია სასჯელს განზრახ მკვლელობის მცდელობისთვის იხდის. ის ყელის არეში მიყენებული ჭრილობებით პატიმრება იპოვეს.
„ყელგამოჭრილი პატიმარი 10 თებერვალს, ღამის საათებში ერთ-ერთ საპირფარეშოში იქნა ნანახი. მალევე მოხდა მისი გადაყვანა ღუდუშაურის სახელობის კლინიკაში. თუმცა, გუშინ ოჯახისთვის ცნობილი გახდა, რომ საკმაოდ უიმედო ვითარებაა, თავის ტვინისა და თირკმელების ფუნქციონირება გათიშულია. გადაჭრილი აქვს საუღლე ვენა და საძილე არტერია.
ჯანდაცვის სამინისტროს მივმართავთ თხოვნით, რომ ყველა საჭირო ღონისძიება გატარონ იმისთვის, რომ ამ პატიმრის სიცოცხლე გადარჩეს“, - აცხადებს ჩოფიკაშვილი.
ის ვერ აკონკრეტებს თუ რითი აქვს პატიმარს ჭრილობები მიყენებული.
„ვერ გეტყვით ჭრილობა რითი აქვს მიყენებული, გამოძიების ვერსიით, სავარაუდოდ, ცივი იარაღითაა მიყენებული“, - აცხადებს ადვოკატი.
ჰქონდა თუ არა ჩოფიკაშვილს სასჯელაღსრულების დაწესებულებაში ვინმესთან კონფლიქტი, ეს მისი უფლებადამცველისთვის უცნობია.
„ჩემთვის დამატებითი გარემოება ცნობილი არ არის. ბუნებრივია, გამოძიება ამ მიმართულებითაც უნდა ჩატარდეს, თუ რას უკავშირდება აღნიშნული შემთხვევა. ჩემი დაცვის ქვეშ მყოფი ბოლოს ერთი თვის წინ ვნახე, შეწყალებასთან დაკავშირებით მოვამზადეთ საბუთები და საქართველოს პრეზიდენტს მივმართეთ. ვიცი, რომ ის ციხის სამკურნალო დაწესებულებაში გარკვეული ფსიქოლოგიური პრობლემების გამო იმყოფებოდა“, - აცხადებს ჩოფიკაშვილი.