FlyHelp-ი ავიაკომპანიებისგან მგზავრებისთვის კომპენსაციების გაცემას უზრუნველყოფს. საიტმა www.flyhelp.ge ნოემბრიდან დაიწყო ფუნქციონირება და მგზავრებს ავიაკომპანიებთან ურთიერთობაში და დაგვიანებული, თუ გადადებული რეისებისათვის კომპენსაციის მიღებაში ეხმარება.
FlyHelp-ის ერთ-ერთი ხელმძღვანელი მიშა ჭანტურია განმარტავს, რომ ამ მოკლე დროში წარმოებული საქმეებიდან 99%-ი ავიაკომპანიებიდან უკვე დაკმაყოფილდა და მგზავრების ნაწილმა კომპენსაცია მიიღო, ან ელოდება.
მგზავრის მიერ დაფიქსირებული საჩივრის შემდეგ, საქმის მოგების შემთხვევაში FlyHelp მომსახურებისათვის კომპენსაციის 30%-ის იტოვებს, ხოლო 70%-ს მგზავრს ურიცხავს. კომპანიაში განმარტავენ, რომ დღემდე წარმოებული საქმეებიდან ყველაზე დიდმა ანაზღაურებადმა თანხამ 600 ევრო შეადგინა.
„2017 წლის მეორე ნახევრიდან დღემდე წარმოებაში გვაქვს 200-მდე საქმე, საიდანაც წარმატებულია, იგულისხმება საქმეები რომელზედაც თანხმობა გვაქვს მიღებული და კლიენტი უკვე კომპენსაციას ელოდება, 99%-ი.
რეალურად 10 საქმე იყო ისეთი, რომელზედაც უარი მივიღეთ, რადგანაც რეისი გადაიდო უამინდობის გამო და უამინდობა არის ისეთი ფორსმაჟორი, რომელიც კანონმდებლობით ავიახაზებს პასუხისმგებლობას უხსნის ავიამგზავრს კომპენსაცია გადაუხადოს.
რაც შეეხება მომართვიანობას, დღეში დაახლოებით 20-მდე საქმე შემოგვდის, რომელსაც ვამუშავებთ და მერე ვახდენთ რეაგირებას. უბრალოდ პროცესი იწელება 1-დან 2 თვემდე, ანუ თუ ნოემბერში მოგვმართა მგზავრმა ზოგს მალევე ჩაერიცხა კომპენსაცია, ზოგიც მოლოდინშია.
ეს ყველაფერი კი გამოწვეულია ძირითადად ავიახაზების შიდა პროცედურებიდან გამომდინარე. ჩვენის მხრივ პროცედურულად საქმეს ძალიან მალე ვაკეთებთ, უბრალოდ ავიაკომპანიიდან პასუხს ველოდებით გარკვეული დროის განმავლობაში“,- აცხადებს FlyHelp-ის ხელმძღვანელი მიშა ჭანტურია.
ჭანტურიას განმარტებით, მგზავრების მხრიდან მომართვიანობა არის უმეტესწილად დაგვიანებულ, გადადებულ და გადაჯავშნულ რეისებზე. FlyHelp-ს მიმართავენ ბარგის დაკარგვაზეც, თუმცა ასეთი მიმართვიანობა შედარებით მცირეა.
მიშა ჭანტურია აცხადებს, რომ მგზავრს პრეტენზიები თანაბრად აქვს ყველა ავიაკომპანიასთან მიმართებაში.
„მას შემდეგ რაც ცნობილი გახდა, რომ ჩვენი კომპანია არსებობს და მგზავრს ავიაკომპანიასთან ურთიერთობა ჩვენი მეშვეობით უფრო უმარტივდება, მომართვიანობა იზრდება. ჩვენც შესაბამისად მიღებულ საჩივარს ვიკვლევთ და თუ გამოიკვეთება, რომ მგზავრს კომპენსაცია ეკუთვნის, ამის შემდეგ მივმართავთ ავიაკომპანიას. ისე არ ხდება, რომ ავიაკომპანიას ყველა საქმეზე მივმართოთ. თუ ჩავთვლით, რომ ავიაკომპანიამ მგზავრთან ურთიერთობაში ნორმები დაარღვია, მაშინ მივმართავთ ავიაკომპანიას და ვუთითებთ თუ რომელი მუხლი იქნა მის მიერ დარღვეული და ამის შემდეგ ახდენენ ისინიც რეაგირებას“, -აცხადებს FlyHelp-ის ხელმძღვანელი.
მიშა ჭანტურია მიიჩნევს, რომ უმეტესწილად მგზავრმა საკუთარი უფლებები არ იცის და პრობლემის გადაწყვეტასაც ვერ ახერხებს.
„ძირითადად მგზავრმა არ იცის საკუთარი უფლებები და ჩვენი მიზანიც იყო ის, რომ მგზავრებს გავაცნოთ საკუთარი უფლებები და შეძლებისდაგვარად დავეხმაროთ. მგზავრს ავიაკომპანიისთვის პრეტენზიით მიმართვა თავადაც თავისუფლად შეუძლია, უბრალოდ მთავარია რომელ მეილზე და მისამართზე იქნება მიმართული. საჩივრის თუ პრეტენზიის წერილიც შედგენილი იყოს ისე, რომ ავიაკომპანიამ პრეტენზია დეტალებში აღიქვას, საუბარია იმაზე, რომ წერილში უნდა იყოს ამა თუ იმ კანონითა და მუხლით აპელირება, რომლის საფუძველზეც ხდება შემდგომ კომპენსაციის მოთხოვნა“, -აცხადებს ჭანტურია.
FlyHelp-ში განმარტავენ, რომ მგზავრები, რომლებიც მოგზაურობენ საჰაერო ტრანსპორტით, სპეციალური უფლებებით სარგებლობენ. კერძოდ, თუ რეისმა დაიგვიანა 2 ან მეტი საათით, ავიახაზები ვალდებულნი არიან, მგზავრები უზრუნველყონ უფასო საკვებითა და გამაგრილებელი სასმელით. ხოლო თუ რეისმა დაიგვიანა სამი ან მეტი საათით, მგზავრები ღებულობენ კომპენსაციას 600 ევრომდე იმ შემთხვევაში, თუ დაგვიანება, ან რეისის გაუქმება გამოწვეულია ავიხაზის მიერ, მაგალითად ტექნიკური გაუმართაობის გამო.
რაზეა დამოკიდებული კომპენსაციის ოდენობა?
კომპენსაციის ოდენობა დამოკიდებულია ფრენის მანძილზე.
250 ევრო - 1500 კილომეტრამდე მანძილზე ფრენისას
400 ევრო - 1500-დან 3500 კილომეტრამდე ფრენისას
600 ევრო - 3500 კილომეტრზე მეტ მანძილზე ფრენისას.
ბილეთის საფასური არანაირ გავლენას არ ახდენს ზემოაღნიშნულ კომპენსაციისათვის დადგენილ თანხებზე!
პირდაპირი მიმართვის შემთხვევაში
- პროცედურა გარკვეულ დროსთან და ხარჯთან არის დაკავშირებული (წერილის შედგენა, სწორი მონაცემების მოძიება, სატელეფონო ზარების განხორციელება)
- წარმატების მიღწევის ნაკლები ალბათობა არსებობს (ავიახაზები ეცდებიან თავიდან აირიდონ კომპენსაციის გადახდა, თუ საჩივარი კვალიფიციურად არ მომზადდა)
- შესაძლებელია ვერ გაითვალისწინოთ აღნიშნულ საკითხში მოქმედი კანონმდებლობის კომპლექსურობა