აპრილიდან საქართველოში განბაჟების ახალი სისტემა, „ATA წიგნაკი“ ამოქმედდება. აღნიშნულ სერვისს სავაჭრო-სამრეწეველო პალატა ნერგავს. სისტემაში უკვე ჩართულია მსოფლიოს 80 ქვეყანა და საქართველო იქნება რიგით 81-ე.
ATA წარმოადგენს საერთაშორისოდ აღიარებულ საერთაშორისო დოკუმენტს, რომელიც ქვეყანაში შეტანილ საქონელს გადასახადებისგან ანთავისუფლებს, საუბარია საექსპოზიციო საქონელზე, კომერციულ ნიმუშებზე, პროფესიულ აღჭურვილობაზე და სხვა.
„ATA წიგნაკის“ ამოქმედება საშუალებას იძლევა სუბიექტი განთავისუფლდეს საბაჟო გადასახადებისაგან, გაიაროს მარტივი საბაჟო პროცედურა, დაზოგოს დრო და რესურსი. აღნიშნული სერვისი ვრცელდება პროდუქციაზე, რომელიც ქვეყანაში ერთ წლამდე ვადით შედის.
„ATA წიგნაკის“ მისაღებად საჭიროა შემდეგი დოკუმენტაციის წარდგენა: გასატანი საქონლის დეტალური სია, დანიშნულების ქვეყანა (ქვეყნები), საქონლის დანიშნულება, საქართველოდან გასვლის თარიღი, „ATA წიგნაკის“ განმკარგავის ვინაობა, „ATA წიგნაკით“ სარგებლობის ვადა, გამგზავნი კომპანიის ინვოისი, საგარანტიო წერილი ბანკიდან ან სადაზღვეო კომპანიიდან.
ხოლო თავად „ATA წიგნაკის“ ფასს განსაზღვრავს თუ სად მიდის ტვირთი და ზოგადად თავად ამ ტვირთის ღირებულება. შესაბამისად „ATA წიგნაკის“ ღირებულება 250-დან 1500 ლარამდეა. თანხის ოდენობა საექსპორტო საქონლის ღირებულებაზეა დამოკიდებული. თუმცა აღნიშნული ტარიფები საბოლოო არ არის და სატარიფო პოლიტიკის დახვეწაზე მუშაობა ჯერ კიდევ მიმდინარეობს. დოკუმენტი 1 წლიანია და სისტემის მონაწილე 80 ქვეყანაში აქვს ძალა.