თბილისის საქალაქო სასამართლოში, გიორგი გიორგანაშვილის, "ბახალას" განაჩენის გამოცხადებას ხმაური მოჰყვა. როგორც ,,ჯი-ეიჩ-ენის" კორესპონდენტი ადგილიდან იუწყება, ჩამსხვრეულია სასამართლოს შენობის შესასვლელი შუშა, დაკავებულია რეჟისორი თორნიკე ბზიავა და "თეთრი ხმაურის მოძრაობის" წევრი ბექა წიქარიშვილი.
თვითმხილველთა განცხადებით, შუშა ბექა წიქარიშვილმა ჩაამსხვრია.
მსახიობ კახა კინწურაშვილის თქმით, თორნიკე ბზიავამ მოგვიანებით გაიგო "ბახალას" განაჩენი და აღელდა.
"თორნიკემ ამ წამს გაიგო "ბახალას" განაჩენი და აღელდა. 8 წელი მიუსაჯეს მეგობარს, ისიც ჩემს მსგავსად ესწრებოდა სასამართლოებს და ხვდება რომ ეს არასწორი, უსამართლო განაჩენია, შესაბამისად ის აღელდა. მოგვიწოდეს დაგვეტოვებინა სასამართლოს შენობა, ეზოდან გავედით, ჭიშკრის იქით. გარეთ თორნიკეს შეურაცხყოფა არავისთვის მიუყენებია. რამდენიმე წუთში დაცვის ფორმაში ჩაცმული 4-5 პირი გამოვიდა და რომ ვიკითხეთ რაში იყო საქმე, შემოდით დროზეო გვითხრეს, თორნიკეს ხელი ჩაავლეს და უხეშად შეიყვანეს შიგნით", - განუცხადა "ჯი-ეიჩ-ენს" კახა კინწურაშვილმა.
გიორგი გიორგანაშვილი იგივე "ბახალა" მოსამართლემ დამნაშავედ ცნო და 8 წლის ვადით თავისუფლების აღკვეთა მიუსაჯა.
მოსამართლის განმარტებით, იქიდან გამომდინარე, რომ აქამდე ნასამართლევი არაა, გიორგანაშვილს სასჯელის მინიმალური ვადა განუსაზღვრა.
"ბახალა" სასამართლო დარბაზშივე დააკავეს.
გიორგი გიორგანაშვილს ბრალი განსაკუთრებით დიდი ოდენობით ნარკოტიკის შეძენა-შენახვაში ედება.
ის 25 იანვარს დააკავეს და 14 ივლისს 20 000-ლარიანი გირაოს სანაცვლოდ გაათავისუფლეს.