„ლაშა დვალიშვილი ჩვენი ოჯახის ახლო ნათესავია. რა თანხასაც პროკურატურა ასახელებს - 2 500 დოლარი, არ ყოფილა. დეკანოზმა ლაშა დვალიშვილს 1000 დოლარი ასესხა“, - განუცხადა „ჯი-ეიჩ-ენს“ დეკანოზ გიორგი მამალაძის ძმამ, თორნიკე მამალაძემ.
როგორც ის აცხადებს, დვალიშვილს რამდენიმე დღის წინ დაურეკა და თანხის უკან დაბრუნება სთხოვა.
„თუ უნდათ, ჩემი და ლაშა დვალიშვილის სატელეფონო ჩანაწერები ამოიღონ და მოისმინონ, რომ რამდენიმე დღის წინ, ლაშას ამ თანხის დაბრუნება ვთხოვე. ეს ფაქტი ადასტურებს იმას, რომ ეს თანხა არა რაიმეს შესაძენად, არამედ სესხის სახით აქვს ჩემს ძმას ლაშასთვის მიცემული. დღეს ტელევიზიით მოვისმინე ლაშას კომენტარი, რომ მას ბანკში ჰქონდა სესხი დასაფარი და იმისთვის სჭირდებოდა. პროკურატურას ყველაფერი ამოღებული ექნება და ნახავდნენ კიდეც, რომ ამ პიროვნებას ბანკში სესხი ნამდვილად აქვს და ამ თანხით გადაიხადა. დეკანოზი მას როგორც ახლო ნათესავს, ისე დაეხმარა და თუ ეს, საქართველოში დასჯადი უნდა იყოს, კარგად ყოფილა ჩვენი საქმე“, - აცხადებს მამალაძე.
როგორც თორნიკე აღნიშნავს, პროკურატურა ერთი წლის განმავლობაში ცდილობდა დვალიშვილის დათანხმებას ეთქვა, რომ დეკანოზმა ციანიდი მისგან შეიძინა.
“პროკურატურამ დვალიშვილი ერთი წლის განმავლობაში ვერ დაითანხმა ამ დიდ ცოდვაზე, ეთქვა, რომ დეკანოზს ციანიდი თითქოს მან მიჰყიდა. შესაბამისად, პროკურატურა კონკრეტულ პირს ვერც ასახელებს. ისიც არ ითქვა, მამა გიორგიმ ის თანხა რისთვის გადაუხადა, რაღაცის საყიდლადო, ასე ამბობენ. რაღაცაში ავტომობილიც შეიძლება იგულისხმებოდეს, აუცილებელი არ არის, რაღაც აუცილებლად ციანიდი იყოს. თუ პროკურატურა რაღაცას ციანიდად აღიქვამს, ეს მათი პრობლემაა“, - აღნიშნავს მამალაძე.
შეგახსენებთ, რომ ე.წ. ციანიდის საქმის პროკურორმა, ჯარჯი წიკლაურმა "პრაიმ ტაიმთან" ინტერვიუში საქმის ახალ დეტალებზე ისაუბრა და განაცხადა, რომ გამოკვეთილია კონკრეტული პირი, რომელთანაც დეკანოზი გიორგი მამალაძე გერმანიაში წასვლის წინ აწარმოებდა მოლაპარაკებას, "რაღაცის შესაძენად". წიკლაურის განცხადებით, აღნიშნული პირი მამალაძის გერმანიაში გამგზავრებამდე დმანისში იმყოფებოდა.
გავრცელებული ინფორმაციით, აღნიშნული პირი დეკანოზ მამალაძის სიძე, ლაშა დვალიშვილია.