„იმედი გვაქვს, რომ ნარკოპოლიტიკასთან დაკავშირებული უწყებათაშორის კომისიის სხდომები დეკრიმინალიზაციის საკანონმდებლო ინიციატივას დაეხმარება და არა პირიქით, ხელს შეუშლის“, - ამის შესახებ თეთრი ხმაურის მოძრაობის წევრმა, ბექა წიქარიშვილა „ჯი-ეიჩ-ენს“ განუცხადა.
მისივე შეფასებით, პოზიტიურია, რომ იმ ორი უწყების პოზიციები იყოს გაჟღერებული, რომელიც ძალიან მნიშვნელოვანია და აქამდე არ მოგვისმენია.
„ვგულისხმობ ჯანდაცვის სამინისტროსა და განათლების სამინისტროს, იმიტომ რომ მომავლის მომხმარებლების მიმართ ჰუმანური ნარკოპოლიტიკა ამ უწყებების ხელში უნდა გადავიდეს, მთავარი როლი ამ სამინისტროებს ეკისრებათ და არა შინაგანს საქმეთა სამინისტროს, როგორც აქამდე იყო. შსს-ს საქმე უნდა იყოს ტრანზიტი, გასაღება გავრცელება და უფრო მაღალკრიმინალური დანაშაულები და არა მოხმარება.
იმედი გვაქვს, უწყებათაშორისი კომისიის სხდომებიც დეკრიმინალიზაციის საკანონმდებლო ინიციატივას შეუწყობს ხელს და არა პირიქით, ხელს შეუშლის. ჯერჯერობით, გამოჩნდა, რომ საკმაო დაბნეულობა იგრძნობოდა სხდომაზე, რადგან არ ჩანდა, რომ უწყებებს აქვთ ერთგვაროვანი და შეთანხმებული პოზიციები“, - განაცხადა ბექა წიქარიშვილმა და აღნიშნა, რომ საგანგაშოდ მოეჩვენა სხდომაზე გაჟღერებული განცხადება, რომ ყველა სახის ნარკოტიკული საშუალების დეკრიმინალიზაცია ქვეყანაში მხოლოდ შესაბამისი ინფრასტრუქტურისა და სერვისების ამოქმედების შემდეგ იქნება შესაძლებელი.
„ჩვენ ამაზე არ შევთანხმებულვართ, დათქმა გვქონდა, რომ მოხმარების ნაწილში 273-ე მუხლის ამოღება,ანუ დეკრიმინალიზაცია მოხდება მას შემდეგ, რაც ერთი წლის განმავლობაში სახელმწიფო გამართავს სერვისებს.
სხდომა საერთო ჯამში არაფრის მომცემი იყო. თეა წულუკიანის თქმით, კომისია ეთანხმება ნარკოპოლიტიკის ლიბერალიზაციას, თუმცა გარკვეული საკითხები ღიად დარჩა, რაზეც, მისი თქმით, 2 კვირაში პოზიციებს შეათანხმებენ და ერთ თვეში კომისია კვლავ შეიკრიბება. თუ ეს ყველაფერი ხელს არ შეუშლის საკანონმდებლო პროცესს, რომელიც პარლამენტში მიმდინარეობს დიდი ხანია და რომელშიც პრინციპში ყველაფერია დამუშავებული, მათ შორის სერვისების განვითარების კონცეფცია, მკურნალობა-რეაბილიტაციის მიმართულებები, თუ ეს ამ ყველაფერს დაეხმარება და ხელს არ შეუშლის, დადებითად შევაფასებ, ამ შემთხვევაში, თუმცა კონკრეტული არაფერი თქმულა და ისევ ერთი და იგივე საკითხის ირგვლივ ტრიალებენ, თითქოს ჯერ უნდა სერვისები გავმართოთ, და ა.შ“, - განმარტა წიქარიშვილმა.
რაც შეეხება იმას, რომ საზღვარზე ნებისმიერი ოდენობის აკრძალული ნარკოტიკული საშუალების შემოტანის შემთხვევაში, პირს დაეკისრება სისხლის სამართლებრივი პასუხისმგებლობა, თუნდაც ეს იყოს პირადი მოხმარებისთვის, წიქარიშვილი აცხადებს, რომ ამაზე ძალოვან უწყებებთან აქამდეც იყო მიღწეული შეთანხმება.
„საპარლამენტო განხილვების პროცესში, კანონპროექტის პირველად ვერსიაში, საზღვარზე პირადი მოხმარების შემოტანა, მცირე რაოდენობით, დასაშვები იყო, თუმცა შემდეგ გარკვეულ ასპექტში გავითვალისწინეთ ძალოვანი უწყებების პოზიცია და სამუშაო პროცესში ეს პუნქტი ამოვიღეთ",- დასძინა თეთრი ხმაურის მოძრაობის წევრმა, ბექა წიქარიშვილმა.
შეგახსენებთ, დღეს, 22 იანვარს, იუსტიციის სამინისტროში ნარკომანიის წინააღმდეგ ბრძოლის უწყებათშორისი საკოორდინაციო საბჭოს სხდომა გაიმართა.