ჯანდაცვის კომიტეტის თავმჯდომარის, აკაკი ზოიძის განცხადებით, ნარკოპოლიტიკის დეკრიმინალიზაციის შესახებ კანონპროექტიდან ამოღებულია ის მუხლი, რომელიც პირადი მოხმარებისთვის, განსაზღვრული ოდენობის ნარკოტიკული ნივთიერების საზღვარზე შემოტანის შემთხვევაში, სისხლის სამართლებრივ პასუხისმგებლობას არ ითვალისწინებდა.
ზოიძის განმარტებით, საზღვარზე ნებისმიერი ოდენობის აკრძალული ნარკოტიკული საშუალების შემოტანის შემთხვევაში, პირს დაეკისრება სისხლის სამართლებრივი პასუხისმგებლობა.
მისივე თქმით, ეს ცვლილება კანონპროექტში სამართალდამცავი სტრუქტურების რეკომენდაციის საფუძველზე იქნა მიღებული და დეკრიმინალიზაციის კანონპროექტის მიღების შემთხვევაშიც არ შეიცვლება.
"პირადი მოხმარებისთვის ადამიანს თუ უდევს ჯიბეში ნახევარი აბი აკრძალული პრეპარატი, დეკრიმინალიზაციის შემთხვევაში მასზე სისხლის სამართლებრივი პასუხისმგებლობა არ ვრცელდება. კანონპროექტით შემოთავაზებული გვქონდა, რომ პირადი მოხმარებისთვის განსაზღვრული ოდენობის ნარკოტიკული ნივთიერების საზღვარზე შემოტანის შემთხვევაშიც შემომტანს არ დაკისრებოდა სისხლის სამართლებრივი პასუხისმგებლობა, თუმცა ამაზე სამართალდამცავმა სტრუქტურებმა განაცხადეს, რომ შეიძლება წახალისდეს ნარკოტიკის ქვეყანაში შემოტანა. დავეთანხმეთ და შემოტანის შემთხვევაში გავრცელდება სისხლის სამართლებრივი პასუხისმგებლობა",- განაცხადა ზოიძემ.