"მტკიცებულებათა ერთობლიობა იძლევა ალბათობის მაღალი ხარისხის შესაძლებლობას, სასამართლო დავარწმუნოთ რომ ბრალდებულთა მიმართ ბრალად შერაცხული ქმედება მხოლოდ მათ მიერ იქნა ჩადენილი", - ამის შესახებ ხორავას ქუჩაზე მოზარდების მკვლელობის საქმის პროკურორმა, ზვიად ფხაკაძემ თბილისის საქალაქო სასამართლოში, სხდომის დაწყებამდე განაცხადა.
პროკურორის განმარტებით, ბრალდების მხარე სხდომაზე წარადგენს დამატებით მტკიცებულებებს, რომლებიც მოპოვებულ იქნა საქმეზე წინასასამართლო სხდომის გამართვის შემდეგ.
"დღეს ბრალდების მხარე სასამართლოში შესავალ სიტყვას წარმოთქვამს, რა დროსაც ისაუბრებს ბრალდებულთა მიერ ბრალად შერაცხული ქმედების თაობაზე - რა გარემოებებში, რა ვითარებაში მოხდა მათ მიერ განხორციელებული დანაშაულებრივი ქმედების ჩადენა, ამასთანავე, ბრალდების მხარე სხდომაზე წარადგენს დამატებით მტკიცებულებებს, რომლებიც მოპოვებულ იქნა საქმეზე წინასასამართლო სხდომის გამართვის შემდეგ. რამდენიმე სახის ექსპერტიზის დასკვნაა, რომელიც დამატებითი მტკიცებულებაა იმ ძირითად მტკიცებულებებთან ერთად, რაც ბრალდების მხარის მიერ იქნა წარდგენილი წინასასამართლო სხდომაზე. მტკიცებულებათა ერთობლიობა იძლევა ალბათობის მაღალი ხარისხის შესაძლებლობას, სასამართლო დავარწმუნოთ რომ ბრალდებულთა მიერ ბრალად შერაცხული ქმედება მხოლოდ მათ მიერ იქნა ჩადენილი"-განაცზადა პროკურორმა.
ცნობისთვის, თბილისის საქალაქო სასამართლოში დღეს, ხორავას ქუჩაზე მოზარდების მკვლელობის საქმის არსებითი განხილვა დაიწყება.
სხდომაზე ბრალდების და დაცვის მხარეები შესავალი სიტყვით წარდგებიან. შესავალი სიტყვების შემდეგ,სახელმწიფო ბრალდება სასამართლოში მის მიერ წარდგენილი მტკიცებულებების გამოკვლევას და მოწმეების დაკითხვას დაიწყებს.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი საავადმყოფოში მიყვანამდე გარდაიცვალა, მეორე კი, მოგვიანებით, საავადმყოფოში.
მომხდარი მკვლელობის ფაქტზე სამართალდამცავებმა 2 დეკემებერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა.
პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს- ყოფილი თანამშრომელია. პასუხისგებაში მიცემულთაგანმხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
ამავე თემაზე: გამოძიება არასწორ გზას დაადგა და ბევრი შეცდომა დაუშვა - მოზარდების მკვლელობის საქმის ადვოკატი
