„ბრალდების დადგენილებას არ ვეთანხმებით, რადგან ის რაც მათ დადგენილებაშია მითითებული, რეალობისგან ძალიან შორსაა“, - ამის შესახებ ხორავას ქუჩაზე მოზარდების მკვლელობის საქმეზე ერთ-ერთი ბრალდებულის ადვოკატმა ტარიელ კაკაბაძემ განაცხადა.
ადვოკატის მტკიცებით, გამოძიება სრულყოფილად არ არის ჩატარებული და დადგენილი არ არის უამრავი დეტალი, რაც საზოგადოებას აწუხებს.
„ არ არის დადგენილი ჩხუბში მონაწილე პირების კონკრეტული პირების სახელები და გვარები. თუ ვინ რას აკეთებდა კონკრეტულ დროს. ამასთან დაკავშირებით მოწმეთა ჩვენებები აბსოლუტურად ურთიერთსაწინააღმდეგო და ურთიერთგამომრიცხავია, შესაბამისად, შეუძლებელია ვენდოთ მოწმეთა ჩვენებებს. მიგვაჩნია, რომ თავის დროზე გამოძიება არასწორ გზას დაადგა და ძალიან ბევრი შეცდომა დაუშვა, რომელთა გამოსწორებაც შემდეგში აღარ მოხერხდა. ამიტომაც, მივიღეთ არასწორად გამოძიებული სისხლის სამართლის საქმე, უამრავი მტკიცებულება, რომელთა შინაარსიც აბსოლუტურად გამორიცხავს და ეწინააღმდეგება ერთმანეთს“, - განაცხადა ტარიელ კაკაბაძემ.
ცნობისთვის, თბილისის საქალაქო სასამართლოში დღეს, ხორავას ქუჩაზე მოზარდების მკვლელობის საქმის არსებითი განხილვა დაიწყება.
სხდომაზე ბრალდების და დაცვის მხარეები შესავალი სიტყვით წარდგებიან. შესავალი სიტყვების შემდეგ,სახელმწიფო ბრალდება სასამართლოში მის მიერ წარდგენილი მტკიცებულებების გამოკვლევას და მოწმეების დაკითხვას დაიწყებს.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი საავადმყოფოში მიყვანამდე გარდაიცვალა, მეორე კი, მოგვიანებით, საავადმყოფოში.
მომხდარი მკვლელობის ფაქტზე სამართალდამცავებმა 2 დეკემებერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა.
პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს- ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.