თბილისში ჩინური ახალი წელი აღნიშნეს. 21 იანვარს, ჩინეთის სავაჭრო პალატის ორგანიზებით, სასტუმრო „ჰუალიგ პრეფერანსში“ ჩინური ახალი წლისადმი მიძღვნილი ღონისძიება გაიმართა.
4716(2018) წლის დადგომას ჩინელები 16 თებერვლიდან 2 მარტის ჩათვლით აღნიშნავენ, თუმცა, საქართველოში მოღვაწე ჩინელებმა ახალი წელი ოფიციალური ღონისძიებით, დრაკონის და ლომის ცეკვებით იზეიმეს. ჩინური ახალი წელი ცნობილია, როგორც მთვარის ახალი წელი, ან გაზაფხულის ფესტივალი. ის დღესასწაულთა მთელ სერიას მოიცავს.
„ეს გაზაფხულის ფესტივალია, რომელიც დღეს დაიწყება და 7 დღე გაგრძელდება. ამ ღონისძებით ჩვენ შევეცდებით გავუზიაროთ ჩვენი ტრადიციები ქართველ მეგობრებს“, - აღნიშნა საღამოს ორგანიზატორმა, სტივ იუმ.
საზეიმო ღონისძიების შემდეგ სტუმრებისთვის ოფიციალური საახალწლო ვახშამიც გაიმართა. ღონისძიებას ჩინელი ბიზნესმენები, ჩინეთის ელჩი საქართველოში, ძი იანჩი და დიპლომატები ესწრებოდნენ.
„დღეს ჩინური ახალი წელია. საქართველოში მცხოვრები ჩინელები აქ, „ჰუალინგში“ აღვნიშნავთ დღესასწაულს. მინდა ყველას მივულოცო. ჩინეთსა და საქართველოს შორის დიდი ხნის მეგობრული და საქმიანი ურთიერთობები არსებობს. ჩვენ ცოტა ხნის წინ მოვაწერეთ თავისუფალი სავაჭრო ურთიერთობების შესახებ ხელშეკრულებას, რაც ორი ქვეყნის ეკონომიკისა და ბიზნესის განვითარებას კიდევ უფრო შეუწყობს ხელს“, - განაცხადა ჟურნალისტებთან ჩინეთის ელჩმა საქართველოში, ძი იანჩმა.