ვმუშაობთ ისეთ მოდელზე, რომელიც შეამცირებს ქვეყანაში ნარკოტიკების პრობლემას, - ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
,,კანონმდებლობა ამ სფეროში შესაცვლელია. მთავრობასთან ერთად ვმუშაობთ ისეთ მოდელზე, რომელიც შეამცირებს ქვეყანაში ნარკოტიკების პრობლემას. დაიცავს ჩვენს შვილებს და ახალგაზრდებს ნარკოტიკების ზიანისგან და ხელს შეუწყობს ცხოვრების ჯანსაღი წესის დამკვიდრებას. ნარკოდამოკიდებულ პირებს დავეხმარებით მკურნალობის, რეაბილიტაციის და ზიანის შემცირების პროგრამებით, ხოლო, პოლიციას ხელს შევუწყობთ ორგანიზებულ ნარკოდანაშაულთან და გამსაღებლებთან ბრძოლაში”, - აღნიშნა თალაკვაძემ.
იუსტიციის სამინისტროში ნარკომანიის წინააღმდეგ ბრძოლის უწყებათაშორისი საკოორდინაციო საბჭოს სხდომა დღეს გაიმართება.
სხდომას საკოორდინაციო საბჭოს თავმჯდომარე, იუსტიციის მინისტრი თეა წულუკიანი გაუძღვება.
წინასწარი ინფორმაციით, საბჭოს სხდომას დაესწრება შინაგან საქმეთა მინისტრი გიორგი გახარია.
ნარკომანიის წინააღმდეგ ბრძოლის უწყებათაშორისი საკოორდინაციო საბჭოს სხდომის მოწვევის თხოვნით თეა წულუკიანს გიორგი გახარიამ 17 იანვარს მიმართა.