„მოწმემ თქვა, ჩემს თავს რომ ვუყურებ, ეს მე არ ვარო.. ამ დროს ეს ადამიანი დაჭრილ ბუტა რობაქიძეს ადგას თავზე და იქვე ყრია იარაღები“, - ამის შესახებ ბუტა რობაქიძის მკვლელობის საქმეზე ერთ-ერთმა ბრალდებულმა, გურამ დონაძემ სასამართლო პროცესის დასრულების შემდეგ განაცხადა.
დონაძის თქმით, იარაღს ადგილი საპატრულო პოლიციამ შეუცვალა.
„ჩვენ აქამდე ამაზე არ ვსაუბრობდით, დღეს კი ვამბობთ, რომ მტკიცებულებებს ადგილი საპატრულო პოლიციამ შეუცვალა. აი ეს ადამიანი, რომელიც დაჭრილ ბუტა რობაქიძეს თავზე ადგას, სასამართლოს ეუბნება, რომ მე არ ვარ ძალიან მგავსო. მეორე მოწმემ, ლევან შერმადინმა თქვა, მე მეორე გადამღებ ჯგუფში ვიყავი, სანამ გურამი ჩემთან მოვიდოდა, იქვე ხალხი პატრული იდგა, და ხალხს ეუბნებოდა - გასროლა მოხდა, იქ შეიარაღებული ჯგუფია და გთხოვთ, ხაზი არ გადაკვეთოთო. მადლობა პროკურორ დავით ნეფარიძეს, რომელმაც მის წარმოდგენილ მოწმეს პირდაპირ უთხრა, ამ კადრებში ნამდვილად თქვენ ხართო, მაშინ ჩავატაროთ ექსპერტიზა და ვაჩვენოთ, ნამდვილად ეს კაცია თუ არა“, - განაცხადა გურამ დონაძემ.