თბილისის საქალაქო სასამართლოში, ბუტა რობაქიძის მამამ, სოსო რობაქიძემ, გადაცემა „ვიდეოპატრულის“ ოპერატორის დაკითხვის დროს, პროტესტის ნიშნად, სასამართლო დარბაზი დატოვა.
როგორც მან ჟურნალისტებს განუცხადა, მთელი 9 თვის განმავლობაში ატრიალებდნენ, რომ რობაქიძე იყო ბანდიტი და ის პატრულ-ინსპექტორმა ბაშალეიშვილმა საპასუხო გასროლით მოკლა.
„მე ვიცი, რომ ეს კასეტა დონაძეს შენახული ჰქონდა. დონაძეს ვკითხე: „ხელაწეული ბუტა რობაქიძე რომ მოკლეს, ეს კასეტა რატომ დამალეთ“? ბაშალეიშვილმა თავის ჩვენებაში თქვა, რომ მანქანიდან გადმოვიდა პიროვნება, რომელსაც ხელში ავტომატი ეჭირა, ორი გასროლა განახორციელა და საპასუხო სროლით მოვკალიო. სად წავიდა ის იარაღი? მე მივუტანე, მე დავუდე თუ ნომერი არ აქვს იმ იარაღს? აქედან ჩანს, რომ იარაღი იქ არ ყოფილა. მე ვიცი, რომ დონაძეს აქვს კიდევ ერთი კასეტა, თუ როგორ მოკლეს სამგორში აჭარელი ბიჭები. მე ეს გამოძიებაც არ მომწონს, რომელიც დღეს არის, ეს ამ პროკურორების დაწყებული გამოძიება არ არის. არიან მოწმეები, რომლებიც მეც არ მომწონს, იმიტომ კი არა, რომ ტყუილი მოწმეები არიან, უბრალოდ, თავიანთ სიტყვას ვერ ამყარებენ. ერთი რამ ვიცი - დონაძე და მიქაძე ცრუობენ“, - განაცხადა სოსო რობაქიძემ .