გაეროში ისრაელის ელჩმა დანი დანონმა გაეროს უშიშროების საბჭოს სხდომაზე ყველა ქვეყანას მოუწოდა საელჩოები იერუსალიმში გადაიტანონ.
„ჩვენ მივესალმებით პრეზიდენტ ტრამპის ამ თამამ გადაწყვეტილებას. მე მოვუწოდებ ყველა ქვეყანას და ყველა ერს, ვისაც მშვიდობა უნდა, შეუერთდეს ჩვენს ამერიკელ მეგობრებს, იერუსალიმი ისრაელის კუთვნილებად აღიარონ და საელჩოები ჩვენს დედაქალაქში გადაიტანონ,“- განაცხადა დანონმა.
მან ასევე განაცხადა, რომ პალესტინამ არა ძალადობაზე და საომარ მოქმედებებზე, არამედ მეზობლებთან სამშვიდობო მოლაპარაკებაზე უნდა იფიქროს.
გაეროს უშიშროების საბჭომ საგანგებო სხდომა გამართა, რომელზეც აშშ-ის მიერ იერუსალიმის ისრაელის დედაქალაქად გამოცხადებას მხარი არ დაუჭირეს.
ტრამპის გადაწყვეტილებას უშიშროების საბჭოს 14 წევრიდან არცერთი არ დაეთანხმა, თუმცა იმის გათვალისწინებით, რომ აშშ-ს ვეტოს უფლება აქვს, გაეროს სხდომაზე რეზოლუცია არ მიუღიათ.
ამასთან, დონალდ ტრამპმა აღნიშნა, რომ ისრაელში აშშ-ის საელჩო თელ-ავივიდან იერუსალიმში გადაინაცვლებს. რადიკალური გაერთიანება „ჰამასი“, რომელსაც ისრაელი და აშშ ტერორისტულ ორგანიზაციად აცხადებენ, ისრაელს ომით დაემუქრა.
