"თუ ვინმე ფიქრობს, რომ არაა საჭირო უშიშროების საბჭო და სხვა მსგავსი ინსტიტუტები, რომელიც კონტროლს გაუწევდა რთულ ვითარებას და დააზღვევდა რისკს, რომ კიდევ უფრო სერიოზულ პრობლემაში არ გადაიზარდოს, ალბათ, ამ მიამიტურ განწყობებს ძალიან ნათელი პასუხი გაეცა", - ამის შესახებ საქართველოს პრეზიდენტმა გიორგი მარგველაშვილმა თბილისში ჩატარებული სპეცოპერაციის შესახებ საუბრისას განაცხადა.
პრეზიდენტის აზრით, მართალია დასრულდა ოპერაცია, მაგრამ ყველა ასეთი შემთხვევის შემდეგ ჯანმრთელია პოლიტიკური სისტემა, რომელიც შესაბამის დასკვნებს აკეთებს.
“უფრო პოლიტიკური შინაარსი აქვს ამ ყველაფერს. დასრულდა ოპერაცია, მაგრამ ყველა ასეთი შემთხვევის შემდეგ ჯანმრთელია პოლიტიკური სისტემა, რომელიც შესაბამის დასკვნებს აკეთებს. ჩვენ ვხედავთ ვითარებას, რომ ის მიამიტური განცდა, რომ საქართველო არსებობს იმ რეალობაში, როდესაც არ არის გლობალური რისკის მატარებელი საშიშროებები, არ არსებობს საშიშროება, რომ რომელიღაცა კრიზისი გადაიზარდოს ბევრად უფრო რთულ ვითარებაში, რომ საქართველოს არ სჭირდება კოორდინირებული პოლიტიკური მოქმედება ასეთ ვითარებაში, არა მხოლოდ ოპერატიულ ნაწილში.
თუ ვინმე ფიქრობს, რომ არაა საჭირო უშიშროების საბჭო და სხვა მსგავსი ინსტიტუტები, რომელიც კონტროლს გაუწევდა რთულ ვითარებას და დააზღვევდა იმ რისკს, რომ კიდევ უფრო სერიოზულ პრობლემაში არ გადაიზარდოს, ალბათ, ამ მიამიტურ განწყობებს ძალიან ნათელი პასუხი გაეცა. შეაფასეთ რეალობა და კიდევ ერთხელ შეხედეთ რეალობას. არ გინდათ მიამიტური სათვალეები. რეალობასთან მიმართებით შეაფასეთ რა რისკები და გამოწვევები აქვს დღეს საქართველოს.მინდა მივესალმო იმ აქტივობას, რაც იყო მედიის მხრიდან. განსაკუთრებით ქარტიის აქტივობას მინდა მივესალმო. ქარტიამ დააფიქსირა თავისი პოზიცია გაშუქებასთან დაკავშირებით. ეს ძალიან მნიშვნელოვანია და ხდებოდა იმ ოპერაციის მიმდინარეობის დროს. ჩვენი მედიის დამოუკიდებლობა არის ძალიან მნიშვნელოვანი საქართველოსთვის. ამავე დროს, ძალიან მნიშვნელოვანი იქნება თუ იქნება დისკუსია იმის თაობაზე, თუ როგორ უნდა მიმდინარეობდეს ანალოგიური მოვლენების გაშუქება. როგორ დავიცვათ სტანდარტები რომ რისკის ქვეშ არ დავაყენოთ არც ჩვენი მებრძოლები და არც მოქალაქეები, ამ თვალსაზრისით ქარტიის მიერ დაწყებული მსჯელობა ძალიან კარგი იქნება, თუ გადავა თვითონ მედიაში და თავის სტანდარტებს შექმნის ამ ვითარებაში მუშაობის”, – განაცხადა გიორგი მარგველაშვილმა.
შეგახსენებთ, თბილისში, ბერი გაბრიელ სალოსის ქუჩაზე კონტრტერორისტული სპეცოპერაცია 21-22 ნოემბერს ჩატარდა.
დაკავებულია დანაშაულებრივი ჯგუფის ერთი წევრი, ხოლო სამი ლიკვიდირებულია.
მათი ვინაობა საზოგადოებისთვის ჯერჯერობით უცნობია.
სპეცოპერაციის დროს არ დაშავებულა არც ერთი მშვიდობიანი მოქალაქე, თუმცა დაიღუპა სუს-ის ერთი თანამშრომელი, დაიჭრა სპეცსამსახურის ორი და შსს-ს ორი თანამშრომელი.
დაჭრილთა ჯანმრთელობის მდგომარეობა, ამ დროისთვის, სტაბილურია.
დაკავებულ პირს, რომელიც გუშინ გავრცელებული ცნობით, რუსეთის მოქალაქე აღმოჩნდა, ბრალი პროკურატურამ გუშინ წაუყენა.
“2017 წლის 21 ნოემბრს დაკავებულ ს.დ-ს, უცხო ქვეყნის ტერორისტულ ორგანიზაციაში გაერთიანებასა და ტერორისტულ საქმიანობაში მისი დახმარებისთვის, ასევე ცეცხლსასროლი იარაღის, საბრძოლო მასალის, ფეთქებადი ნივთიერების და ასაფეთქებელი მოწყობილობის ტერორისტული მიზნით, მართლსაწინააღმდეგო შეძენა, შენახვა ტარებისთვის წარედგინა ბრალდება საქართველოს სისხლის სამართლის კოდექსის 328-ე და 323 პრიმა მუხლის პირველი ნაწილით, რაც სასჯელის სახედ და ზომად თავისუფლების აღკვეთას 10-დან 17 წლამდე ვადით ითვალისწინებს. საქმეზე დამატებითი ინფორმაცია ხვალ გავრცელდება“, - ნათქვამია პროკურატურის განცხადებაში, რომელიც გუშინ გავრცელდა.