თუ ლიკვიდირებული არის ასეთი ფორმით ახმედ ჩატაევი, ჩვენმა ხელისუფლებამ გაიჩალიჩა პრობლემა, რომელიც ამ ქვეყანას არ ჰქონდა აქამდე, - ამის შესახებ „ევროპული საქართველოს“ წევრმა გივი თარგამაძემ თბილისში ჩატარებულ სპეცოპერაციასთან დაკავშირებით განაცხადა.
"რუსთავი 2"-ის პირდაპირ ეთერში, გივი თარგამაძე სპეცოპერაციის შემდეგ დაგროვილ კითხვებზე საუბრობს.
„პირველადი ინფორმაცია დანაშაულებრივი ჯგუფის თაობაზე სპეცსამსახურებმა როდის მიიღეს? შემდგომ, მიიღეს ის თუ არა ღია წყაროებიდან, აგენტური ქსელიდან თუ სხვა ქვეყნის სპეცსამსახურების მეშვეობით? შემდგომ, იმყოფებოდა თუ არა ჯგუფი სპეცსამსახურების თვალთვალის ქვეშ? როდის იქნა მიღებული გადაწყვეტილება გადაუდებელ დაკავებასთან დაკავშირებით? რამ გამოიწვია საერთოდ გადაწყვეტილება, რომ გადაუდებელი დაკავება მომხდარიყო ქალაქის ცენტრში, მჭიდროდ დასახლებულ უბანში?“, - განაცხადა გივი თარგამაძემ, რომელმაც აქვე აღნიშნა, რომ გუშინდელი სპეცოპერაციიდან გამომდინარე შთაბეჭდილება რჩება, რომ საფრთხის წინაშე სპეცრაზმელები იყვნენ და ყურადღებას ამახვილებს, რომ სპეცოპერაციის დროს საფრთხის სწორი შეფასება არ მოხდა.
მისივე თქმით, ჩატაევი იყო ISIS-ის წევრი.
„ახმედ ჩატაევი იყო ISIS-ის კავკასიის მიმართულების ერთ-ერთი მთავარი ლიდერი. ასე მოიხსენიებოდა ყოველთვის, იმიტომ, რომ ასეც იყო სინამდვილეში. იმ შემთხვევაში, თუ ლიკვიდირებული არის ასეთი დონის ისლამური სახელმწიფოს ლიდერი, რა თქმა უნდა, საფრთხეები ქვეყნის წინაშე მატულობს", - დასძინა თარგამაძემ.