„ვიცით რა უნდა გააკეთოს თანამოსაყდრემ, როცა პატრიარქი ცოცხალი აღარ იქნება, დიდი ხნის შემდეგ, მაგრამ არ ვიცით, რა უნდა გააკეთოს სანამ ის ქმედუნარიანი და ცოცხალია“, - ამის შესახებ საქართველოს კათოლიკოს პატრიარქის მდივანმა, მამა მიქაელ ბოტკოველმა საქართველოს კათოლიკოს-პატრიარქის მიერ, მის თანამოსაყდრედ მიტროპოლიტი შიოს დასახელების შესახებ საუბრისას განაცხადა.
მისივე თქმით, მიტროპოლიტი შიო იქნება მთავარი ჭირისუფალი ეკლესიის მხრიდან.
"არ ვიცით, რა დავალებებს მისცემს მას მისი უწმინდესობა, ვიცით, რა უნდა გააკეთოს თანამოსაყდრემ, როცა პატრიარქი აღარ იქნება, დიდი ხნის შემდეგ, მაგრამ არ ვიცით რა უნდა გააკეთოს მან, სანამ მისი უწმინდესობა ქმედუნარიანი და ცოცხალია.
ჩვენ ეკლესიის მართვა-გამგეობის დებულების მიხედვით გაწერილი გვაქვს, რომ ის იქნება მთავარი ჭირისუფალი ეკლესიის მხრიდან და ის უხელმძღვანელებს ეკლესიას ახალი პატრიარქის არჩევამდე.
ვიცით ყველაფერი, რაც მოხდება შემდეგ, მაგრამ მანამდე როგორ იქნება, ეს პატრიარქის გადასაწყვეტია. ამ დღეებში ჩამოვყალიბდებით რა უფლება-მოვალეობებს დააკისრეს მას მისი უწმინდესობა“, - განაცხადა მიქაელ ბოტკოველი TV პირველის ეთერში.
შეგახსენებთ, სრულიად საქართველოს კათოლიკოს პატრიაქმა, ილია მეორემ დღეს, ქაშუეთში, სადღესასწაულო წირვაზე, მის თანამოსაყდრედ სენაკისა და ჩხოროწყუს მიტროპოლიტი შიო მუჯირი წარადგინა.
ცნობისთვის, საპატრიარქო ტახტის მოსაყდრე სრულიად საქართველოს კათოლიკოს-პატრიარქის გარდაცვალების, გადადგომის ან სხვა ისეთი მიზეზის გამო, რომელიც შეუძლებელს ხდის კათოლიკოს-პატრიარქისათვის თავისი მოვალეობების შესრულებას, მართავს ეკლესიას ახალი კათოლიკოს-პატრიარქის არჩევამდე.
