„ძალადობასთან არანაირი კავშირი არ მაქვს, არასდროს არავისთან მომსვლია ჩხუბი. ისეთი ადამიანი ვარ, რომ ჩემგან, ჩემი ბუნებისგან ძალადობა ძალიან შორსაა. თურქეთში მაბრალებენ, რომ თითქოს ტერორისტებთან ვარ კავშირში, ამით შეურაცხყოფა მომაყენეს. არც საქართველოში და არც თურქეთში, არც ლეგალური და არც არალეგალური შეხება ტერორისტებთან არ მაქვს“, - განაცხადა სასამართლო პროცესზე დემირელის კოლეჯის მენეჯერმა, მუსტაფა ემრე ჩაბუქმა.
როგორც ჩაბუქმა განაცხადა, ის გიულენს საერთოდ არ იცნობს და მას არც დემირელის კოლეჯთან აქვს რაიმე სახის შეხება.
„ფეთჰულა გიულენს საერთოდ არ ვიცნობ, არასდროს შემხვედრია. გიულენი დემირელის კოლეჯის დირექტორი არ არის, არც პატრონი, არც მეწილე და არც მისი დაფუძნებულია. მე მიყვარს ჩემი სამშობლო, საქართველოც მიყვარს. თურქეთში არიან დამნაშავეები, რა თქმა უნდა, და ისინი უნდა დაისაჯონ. მე დანაშაული არ ჩამიდენია, მაგრამ მაბრალებენ, რომ ჩავიდინე... ამდენ რამეს, რაც საქართველოში გავაკეთე, არც ერთი ტერორისტი არ გააკეთებდა, არათუ სხვა ქვეყნისთვის, არამედ საკუთარი სამშობლოსთვისაც კი“, - განაცხადა მუსტაფა ემრე ჩაბუქმა.
ამ წუთებში თბილისის საქალაქო სასამართლოში სხდომა დახურულ რეჟიმში მიმდინარეობს, რადგან მუსტაფა ემრე ჩაბუქის მეუღლე, თუბა ჩაბუქი სასამართლოს ახსნა-განმარტებას სახელმწიფო საიდუმლოების შემცველ საკითხებზე აძლევს.
შეგახსენებთ, რომ დემირელის სკოლის მენეჯერი, მუსტაფა ემრე ჩაბუქი 24 მაისს, საქართველოში დააკავეეს. მას თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. ჩაბუქს შეიარაღებული ტერორისტული ორგანიზაციის წევრობა ედება ბრალად.
7 ივლისს ლტოლვილთა და განსახლების სამინისტრომ ჩაბუქს ლტოლვილის სტატუსის მინიჭებაზე უარი განუცხადა. სამინისტროს მიერ გამოცემული აქტი ადვოკატებმა გაასაჩივრეს. საჩივრით ადვოკატებმა თბილისის საქალაქო სასამართლოს ადმინისტრაციულ საქმეთა კოლეგიას მიმართეს.