"დეპუტატ შალელაშვილის შესახებ მსმენია მხოლოდ ის, რასაც მედია ავრცელებდა, რომ რეალურად ეს არის პარლამენტში ერთადერთი დეპუტატი, რომელიც ხელფასს იღებს და სამსახურში არ დადის", - ამის შესახებ იუსტიციის მინისტრმა თეა წულუკიანმა განაცხადა.
წულუკიანის თქმით, კარგია თუ მისმა განცხადებამ დეპუტატი სამსახურში მიიყვანა და მუშაობა დააწყებინა.
„დეპუტატ შალელაშვილის შესახებ ბევრი არაფერი მსმენია, მას არ ვიცნობ. მსმენია მხოლოდ ის, რასაც მედია ავრცელებდა, რომ რეალურად ეს არის პარლამენტში ერთადერთი დეპუტატი, რომელიც ხელფასს იღებს და სამსახურში არ დადის. კარგია თუ ჩემმა განცხადებამ ის სამსახურში მიიყვანა და მუშაობა დააწყებინა", –განაცხადა მინისტრმა.
მანამდე კი თეა წულუკიანმა უჩა ნანუაშვილს ისტორიაში პირველი უსამართლო ომბუდსმენი უწოდა. რასაც უმრავლესობის დეპუტატი შოთა შალელაშვილი გამოეხმაურა და თეა წულუკიანის განცხადებას უპასუხისმგებლო უწოდა.
თეა წულუკიანმა უჩა ნანუაშვილის შესახებ კომენტარი დღესაც გააკეთა:
"რაც შეეხება ბატონ უჩას საქმიანობას, მე მისი შეფასება გუშინდელი ჩემი 17-წლიანი პროფესიული დაკვირვების შედეგის საჯაროდ განცხადებით არ დამისრულებია, ამ საქმიანობას კიდევ შევაფასებ, მანამ ის არის ომბუდსმენი და მერეც, როცა აღარ იქნება ომბუდსმენი და თუ მისი სურვილი იქნება, როდესაც ის შეწყვეტს ომბუდსმენობას, მზად ვარ, მასთან გავმართო საჯარო პოლიტიკური დებატი“, – აღნიშნა თეა წულუკიანმა.