თბილისის ვიცემერობის კანდიდატი ირაკლი ხმალაძე აცხადებს, რომ დედაქალაქის მთავრობის დამტკიცებაზე კახა კალაძის მისვლა საჭირო და სავალდებულო არ არის. მისი თქმით, კალაძეს უფლებამოსილება უკვე აქვს და საკრებულოს წინაშე წარდგენა სავალდებულოა მხოლოდ იმ თანამდებობის პირებისთვის, ვინც ჯერ საბოლოოდ დამტკიცებული არ არის.
"კახა კალაძე არის არჩეული მერი, უფლებამოსილების შესრულებას ორშაბათიდან შეუდგა და შესაბამისად, მას არ სჭირდება საკრებულოს თანხმობა. ჩვენ ვართ ის ადამიანები, ვისაც საკრებულოს თანხმობა გვჭირდება. აქედან გამომდინარე, კალაძის მიერ წარმოდგენილი მთავრობის ახალი შემადგენლობა მოვედით დღეს საკრებულოში, რომ გავიაროთ პროცედურა და ჩვენი 4-წლიანი მმართველობის პროგრამის შესახებ მოვახსენოთ დეპუტატებს. გავცემთ პასუხებს ყველა დასმულ კითხვას",- განაცხადა ირაკლი ხმალაძემ.
ოპოზიციური პარტიები თბილისის ახალ მერს მწვავედ აკრიტიკებენ იმის გამო, რომ დღეს საკრებულოში მისვლას არ აპირებს.
თბილისის საკრებულოში ახალი მთავრობის წევრთა დასამტკიცებლად კენჭისყრა 17:00 საათზე იგეგმება.