"ჩვენ არ ვცნობთ საზღვარს, რომელზეც ანატოლი ბიბილოვი საუბრობს, - ამის შესახებ საქართველოში აშშ-ის ელჩმა იან კელიმ ოკუპირებული ცხინვალის რეგიონის დე ფაქტო ლიდერის განცხადების კომენტირებისას განაცხადა.
მისი განმარტებით, ეს არ არის საერთაშორისოდ აღიარებული საზღვარი და შესაბამისად ხელოვნური ბარიერების შექმნა არის არალეგიტიმური და არაკანონიერი.
"ნებისმიერ ნაბიჯს, რომელიც ხელოვნური ბარიერების შექმნისკენაა მიმართული ე.წ. სამხრეთ ოსეთსა და საქართველოს დარჩენილ ნაწილში, ჩვენ ჩავთვლით მიუღებლად და არაკანონიერად. ეს არის არასწორი მიმართულებით გადადგმული ნაბიჯი", - განაცხადა იან კელიმ.
საქართველოს ოკუპირებული რეგიონის ე.წ. სამხრეთ ოსეთის დე ფაქტო რესპუბლიკის პრეზიდენტი განცხადებით, აუცილებელია, საქართველოსთან ე.წ. საზღვარი სრულად მოეწყოს, მათ შორის საინჟინრო თვალსაზრისით.
ანატოლი ბიბილოვის თქმით, ე.წ. საზღვარს საერთაშორისო სამართლის ნორმების შესაბამისად განამტკიცებენ.
