„აჭარა - ახალი შესაძლებლობების რეგიონი“ - ამ სათაურით სტატიას ყველაზე გავლენიანი ბიზნესგამოცემა „Forbes Georgia“ წერს. წერილის ავტორი აჭარის საინვესტიციო შესაძლებლობებზე საუბრობს და აღნიშნავს, რომ „აჭარა ის რეგიონია, რომელიც თავისი გეოგრაფიული ლოკაციიდან თუ სხვა ფაქტორებიდან გამომდინარე ბოლო წლების განმავლობაში განსაკუთრებით ექცევა უცხოელი ინვესტორების ყურადღების ცენტრში და ამას სტატისტიკური მონაცემებიც მოწმობს, რომლის მიხედვითაც რეგიონში დარეგისტრირებული უცხოური და უცხოურ-ქართული საწარმოების რაოდენობა წლიდან წლამდე მზარდია“.
ინგლისურენოვან სტატიაში ასევე იმ პოზიტიურ ფაქტორებზეა გამახვილებული ყურადღება, რაც ინვესტორებისთვის აჭარაში კაპიტალის დაბანდებისას გადამწყვეტია. აჭარის ფინანსთა და ეკონომიკის სამინისტროში ამ კუთხით ძირითად ასპექტებზე ამახვილებენ ყურადღებას:
„ხელმისაწვდომი სამუშაო ძალა, ლიბერალური საგადასახადო კანონმდებლობა და ეფექტიანი სახელმწიფო სერვისები - ეს იმ შესაძლებლობათა ჩამონათვალია, რასაც აჭარის რეგიონი ნებისმიერ დაინტერესებულ ინვესტორს სთავაზობს. საინვესტიციო გარემოზე დიდ გავლენას ასევე საერთაშორისო რეიტინგებში საქართველოს მოწინავე პოზიციონირება და უსაფრთხოების მაღალი მაჩვენებელი ახდენს“.
„FORBES”-ის ჟურნალისტი აჭარის ფინანსთა და ეკონომიკის მინისტრს რამაზ ბოლქვაძეს ესაუბრა. სტატიაში მინისტრი რეგიონში არსებულ ჯანსაღ, თავისუფალ და კონკურენტუნარიან საინვესტიციო გარემოზე საუბრობს და ბოლო პერიოდში განხორციელებულ რამდენიმემილიონიან საინვესტიციო პროექტებზე ამახვილებს ყურადღებას:
„ბოლო წლების სტატისტიკური მონაცემების მიხედვით აჭარაში 2016 წლის განმავლობაში ჯამში 428 მილიონი აშშ დოლარის ინვესტიცია განხორციელდა. აღსანიშნავია, რომ 71% პირდაპირ უცხოურ ინვესტიცას წარმოადგენს. ჩვენი ეკონომიკური გათვლებით 2017 წელს არანაკლებ პოზიტიური ტენდეცია გვექნება. ბათუმის ე.წ. ახალ ბულვარში, სადაც 520 მლნ ლარის ინვესტიცია ხორციელდება, დამატებით 1700 სასტუმრო ნომერი გაჩნდება, რაც თავის მხრივ დაახლოებით 2600 სამუშაო ადგილს შექმნის. ჩვენთვის უმნიშვნელოვანესია რეგიონის სწორი ურბანული განვითარება და ამ კუთხით ძალიან აქტიურად ვმუშაობთ. მაგალითად აჭარის ფინანსთა და ეკონომიკის სამინისტრომ გმირთა ხეივანის ერთიანი განვითარების კონცეფცია შეიმუშავა. ამ მიდგომამ უკვე გამოიღო თავისი შედეგი და დღეისთვის ამ კონკრეტულ ნაწილში, 12 საინვესტიციო პროექტი უკვე მიმდინარეობს, რომელთა საერთო საინვესტიციო ღირებულება 600 მლნ ლარს აჭარბებს. ამ ეტაპზე დასაქმებულია 1500-მდე ადამიანი. განხორციელებული ინვესტიციების შედეგად 1000 სასტუმრო ნომერი დაემატება, რაც 1000-ზე მეტი ახალი სამუშაო ადგილის შექმნის წინაპირობაა. ჩვენი მიზანია თანაბრად ავითვისოთ აჭარის საინვესტიციო რესურსი, ქალაქის ცენტრალური უბნების პარალელურად, პერიფერიული ტერიტორიები და ასევე მუნიციპალიტეტები განვითარდეს. ამ მხრივ ქობულეთში უპრეცენდენტო ინვესტიციას ჩაეყარა საფუძველი, 200 მლნ ლარის ინვესტიციის ფარგლებში 400-ზე მეტი ადამიანი დასაქმდება“
„აჭარაში საინვესტიციო შესაძლებლობების რეალიზების თვალსაზრისით რამდენიმე სექტორია მიმზიდველი. გასული წლის სტატისტიკის მიხედვით ინვესტიციების ყველაზე დიდი მოცულობა ენერგო სექტორზე მოდიოდა , კერძოდ 45%. ამ მიმართულებით უმსხვილესი ინვესტიცია ნორვეგიულ-ინდური ჰიდროელექტროსადგურის მშენებლობის პროექტში განხორცილდა. მომდევნო ორი მოწინავე სექტორი - ტურიზმი და მშენებლობაა. რაც შეეხება უშუალოდ ტურიზმს ერთერთი ყველაზე გონივრული და სტრატეგიული ნაბიჯი აჭარის მთავრობის მხრიდან ალბათ რეგიონში სამთო სათხილამურო ტურიზმის განვითარების წამოწყება იყო. კურორტი „გოდერძი“ - პირველი კურორტი საქართველოში, სადაც გენერალური განვითარებისა და რეგულარული განაშენიანების გეგმა იქნა შემუშავებული. შედეგად დღეისათვის მაღალმთიან აჭარაში 6 საინვესტიციო პროექტი უკვე მიმდინარეობს, რომლის ჯამური ინვესტიციაც 80 მლნ ლარს შეადგენს. საერთო ჯამში კურორტი 7 000 ტურისტზეა გათვლილი და მის მიმართ როგორც ტურისტული, ისე საინვესტიციო ინტერესი დღითიდღე მზარდია“- ნათქვამია სტატიაში.
გამოცემა აჭარის რეგიონის სტრატეგიულად ხელსაყრელ გეოგრაფიულ ადგილმდებარეობაზე წერს და აღნიშნავს, რომ რეგიონი არა მხოლოდ ადგილობრივი წარმოების თვალსაზრისით არის საინტერესო, არამედ როგორც ლოგისტიკური ჰაბი და ამ მიმართულებით მას მომგებიანი საინვესტიციო ლოკაცია აქვს.