არ ვგულშემატკივრობთ არც ერთ პარტიას და ვდგავართ ხალხის მხარეს, იმ ადამიანების გვერდით, რომლებიც ამ დრომდე იმედგაცრუებულია და მოლოდინშია უკეთესის, - ამის შესახებ პოლიტიკური პარტია ,,რეფორმატორების'' განცხადებაშია აღნიშნული.
როგორც განცხადებაში წერია, ხვალ ტარდება ე.წ. ტექნიკური არჩევნები, რომელიც ვერ გამოხატავს მოსახლეობის ნამდვილ ნებას და ინტერესებს.
"ვგულშემატკივრობთ, ბევრ ღირსეულ და პროფესიონალ კანდიდატს, მიუხედავად მათი წარმდგენი პარტიების მიმართ კრიტიკული ან რბილად კრიტიკული დამოკიდებულებისა.
არ ვგულშემატკივრობთ არც ერთ პარტიას და ვდგავართ ხალხის მხარეს, იმ ადამიანების გვერდით, რომლებიც ამ დრომდე იმედგაცრუებულია და მოლოდინშია უკეთესის. აქვე აღვნიშნავთ,რომ გაგებით ვეკიდებით იმ ხალხის მდგომარეობას, რომლებიც იძულებულნი არიან, არჩევანი გააკეთონ ნაკლებად საიმედო და ავტორიტეტულ პოლიტიკურ ძალებს შორის.
მიგვაჩნია, რომ ხვალ ტარდება ე.წ. ტექნიკური არჩევნები, რომელიც პრაქტიკულად არ და ვერ გამოხატავს ჩვენი მოსახლეობის ნამდვილ ნებას და ინტერესებს. ერთადერთი, რაც შეგვიძლია ვისურვოთ არის ის, რომ პოლიტიკური პლურალიზმის და წონასწორობის თვალსაზრისით, საჯარო ინტერესებიდან გამომდინარე, უმჯობესი იქნება მეტი პარტიის წარმომადგენლის წარმატება.
მშვიდობიან და დემოკრატიულ ხვალინდელ დღეს გისურვებთ", - ნათქვამია პარტიის განცხადებაში.