„სამართლიანი არჩევნების“ ხელმძღვანელის, მიხეილ ბენიძის განცხადებით, მარნეულის რაიონის სოფელ ყიზილაჯლოში გუშინ მომხდარი ინციდენტი წინასაარჩევნო გარემოს ჩრდილს აყენებს.
ბენიძის განმარტებით, გუშინდელმა ინციდენტმა წინასაარჩევნო პერიოდში გარკვეული დისონანსი შეიტანა.
„ეს დასაგმობი ინციდენტია და მნიშვნელოვანია, რომ სამართალდამცველმა უწყებებმა ფაქტი ეფექტურად, სწრაფად და გამჭვირვალედ გამოიძიონ. მიუხედავად იმისა ამ ინციდენტს აქვს თუ არა პოლიტიკური მოტივი, წინასაარჩევნო პერიოდში, როდესაც მმართველი პარტიის კანდიდატსა თუ ნებისმიერი სხვა პარტიის კანდიდატზე მსგავსი სახის თავდასხმა ხდება, ეს წინასაარჩევნო პროცესს ჩრდილს აყენებს და გარემოსთვის პოზიტიური არ არის“, - განაცხადა მიხეილ ბენიძემ.
შეგახსენებთ, 19 ოქტომბერს, გვიან ღამით, მარნეულის რაიონის სოფელ ყიზილაჯლოში, პარტია „ქართული ოცნების“ საარჩევნო შტაბის მიმდებარე ტერიტორიაზე, დაუდგენელმა პირმა ავტომატური ცეცხლსასროლი იარაღიდან გასროლით ოთხი პირი დაჭრა.
დაჭრილები სასწრაფო სამედიცინო დახმარების ბრიგადამ საავადმყოფოში გადაიყვანა. მათ სიცოცხლეს საფრთხე არ ემუქრება.
მომხდარ ფაქტთან დაკავშირებით შინაგან საქმეთა სამინისტროში გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.