„ყველა ადამიანს აქვს უფლება, თავისი კონკრეტული პოზიცია გამოხატოს ნებისმიერ ფაქტთან დაკავშირებით, მაგრამ ამ კონკრეტულ შემთხვევაში, აუცილებლად უნდა დაველოდოთ გამოძიებას იმისათვის, რომ ვინმემ პოლიტიკური სპეკულაციები არ დაიწყოს", - ამის შესახებ "ფრაქცია „ქართული ოცნების“ თავმჯდომარემ, მამუკა მდინარაძემ ყიზილაჯლოში მომხდართან დაკავშირებით განაცხადა.
მისივე განმარტებით, ამ დროისთვის, რაიმე პოლიტიკურთან დაკავშირებული ვერსიები გამოკვეთილი არ არის, თუმცა გამოძიება მუშაობს ყველა ვერსიაზე.
"რა თქმა უნდა, ფაქტი არის ძალიან ცუდი, მაგრამ სანამ არ გაირკვევა რეალური ვერსიები, წინასწარი შეფასებებისგან ყველამ თავი უნდა შეიკავოს. აუცილებელია, პასუხი გაეცეს კითხვას, უკავშირდება თუ არა მომხდარი არჩევნებს“, - განაცხადა მამუკა მდინარაძემ.
შეგახსენებთ, 19 ოქტომბერს, გვიან ღამით, მარნეულის რაიონის სოფელ ყიზილაჯლოში, პარტია „ქართული ოცნების“ საარჩევნო შტაბის მიმდებარე ტერიტორიაზე, დაუდგენელმა პირმა ავტომატური ცეცხლსასროლი იარაღიდან გასროლით ოთხი პირი დაჭრა.
დაჭრილები სასწრაფო სამედიცინო დახმარების ბრიგადამ საავადმყოფოში გადაიყვანა. მათ სიცოცხლეს საფრთხე არ ემუქრება.
მომხდარ ფაქტთან დაკავშირებით შინაგან საქმეთა სამინისტროში გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.
