თათრეთის დედაქალაქი და რუსეთის ერთ-ერთი უდიდესი ქალაქი ყაზანი თბილისთან პირდაპირი ავიარეისების დანიშვნითაა დაინტერესებული. როგორც რუსული მედია ყაზანის აეროპორტზე დაყრდნობით წერს, აეროპორტს 2018 წლის გეგმა უკვე მზად აქვს და თათრეთის მცხოვრებთათვის მალე ახალი რეისები იქნება ხელმისაწვდომი.
„იგეგმება ავიარეისების დაწყება თბილისის, ერევანისა და ნოვოსიბირსკის მიმართულებით. ავიაკომპანია AtlasGlobal-ი ყაზანი-სტამბოლის მიმართულებაზე იფრენს. აეროპორტი ფრენების არეალის გაფართოებით დაინტერესებულია“, აცხადებენ აეროპორტში.
რუსული მედიის ინფორმაციითვე, თათრეთში ოპერირებას მალე ახალი ავიაკომპანიებიც დაიწყებენ, ამ მხრივ საუბარია ავიაკომპანიებზე Georgian Airways-სა და Azimuth Aero-ზე.
აღსანიშნავია, რომ ქართული ავიაკომპანია Georgian Airways-ი გასულ წელს ყაზანის მიმართულებაზე ოპერირებით მართლაც დაინტერესებული იყო და კომპანიამ ბაზრის კვლევის შემდეგ ავიაბილეთების რეალიზაციაც კი დაიწყო, თუმცა Georgian Airways-ის ინფორმაციით, რუსეთის საავიაციო ხელისუფლების მოულოდნელი გადაწყვეტილებით ავიაკომპანიას ფრენების ნებართვა გაუუქმდა. მოგვიანებით კი ისევ აღუდგა, თუმცა ავიაკომპანიას ყაზანის მიმართულებაზე ფრენები აღარ დაუწყია.
Georgian Airways-ის მენეჯმენტი აცხადებს, რომ 2018 წლისთვის ევროპის მიმართულებით საკმაოდ ბევრ სიხშირეს ამატებენ და ამ დროისათვის საბოლოო გადაწყვეტილება იფრენენ თუ არა თბილისი-ყაზანის მიმართულებაზე მიღებული არ არის.
„გასულ წერს ყაზანის მიმართულებით ფრენების დაწყება მართლაც გვსურდა. ბაზრის კვლევაც გავაკეთეთ და შესაბამისი პარტნიორებიც მოვიზიდეთ, თუმცა გარკვეული მიზეზების გამო რეისები არ დაგვიწყია. ამ დროისათვის Georgian Airways-ს ყაზანის მიმართულებით ოპერირებაზე გადაწყვეტილება მიღებული არ აქვს. განვიხილავთ, თუმც საბოლოო გადაწყვეტილება არ არსებობს. გასულ წელს ვფიქრობდით, რომ ყაზანი მზარდი მიმართულება იქნებოდა“, აცხადებენ ავიაკომპანიაში.
