მშვიდობის დარგში ნობელის პრემია ბირთვული იარაღის აკრძალვის საერთაშორისო კამპანიას გადაეცა. ჯგუფმა პრესტიჟული ჯილდო ბირთვული იარაღის გამოყენების შემთხვევაში კატასტროფულ ჰუმანიტარულ შედეგებზე ყურადღების გამახვილებისთვის დაიმსახურა. მშვიდობის დარგში ნობელის პრემიის მინიჭება ყოველწლიურად ოსლოს კომიტეტის ხუთი წევრის მიერ ხდება, რომლებსაც ნორვეგიის პარლამენტი ირჩევს. შარშან ანალოგიური ჯილდო კოლუმბიის პრეზიდენტ ხუან მანუელ სანტოსს გადაეცა მემარცხენე რადიკალურ დაჯგუფებასთან თითქმის 50 წლიანი კონფლიქტის დასრულებისთვის. წესების თანახმად, აღნიშნულ პრემიაზე ნომინირებულთა სახელების გასაჯაროება მხოლოდ 50 წლის შემდეგ ხდება. წელს მშვიდობის დარგში პრემიაზე 318 პრეტედენტი იყო წარდგენილი.
