"თეთრი ხმაურის მოძრაობა" ახალ კამპანიას იწყებს.
მოძრაობა მიიჩნევს, რომ პარლამენტი ნარკოპოლიტიკის შესახებ ახალი კანონპროექტის მიღებას ხელოვნურად აჭიანურებს.
კამპანია, რომელიც დღეიდან დაიწყო, მოიცავს ვებგვერდს - www.wnm.ge/.
ვებგვერდის საშუალებით მოქალაქეები ვიდეორგოლების ნახვას შეძლებენ. ვიდეოებში ნაჩვენები იქნება თუ რომელი და რამდენი პოლიტიკოსია ნარკოპოლიტიკის შეცვლის მომხრე და წინააღმდეგი.
მოძრაობის წევრები დარწმუნებულები არიან, რომ საზოგადოების ჩართულობით ნარკოპოლიტიკის გადახედვა დღის წესრიგში უმოკლეს ვადაში დადგება.
"მოახლოებული არჩევნების ფონზე, ნარკოპოლიტიკის რეფორმისადმი მოლოდინი საზოგადოებაში კრიტიკულ ზღვარს აღწევს.
მოქალაქეები ხელისუფლებას ხმამაღლა მოუწოდებენ - რეპრესიული ნარკოპოლიტიკა უნდა #დასრულდეს!
პარლამენტი ისტორიული ნაბიჯის წინაშე დგას - შეცვალოს მიდგომა და მიიღოს ახალი კანონპროექტი.
იმისთვის, რომ გადაწყვეტილების მიმღებთ კიდევ ერთხელ დავანახოთ საზოგადოების სრული მობილიზება და ერთიანი პოზიციის სიმყარე, "თეთრი ხმაურის მოძრაობა" იწყებს სამოქალაქო კამპანიას, რომელშიც თითოეული ჩვენგანის ჩართულობა უმნიშვნელოვანესია", - აცხადებენ ორგანიზაციის წევრები.
ცნობისთვის, გუშინ სახალხო დამცველი უჩა ნანუაშვილი "ეროვნული პლატფორმის" მიერ პარლამენტში წარდგენილ საკანონმდებლო ცვლილებებს გამოეხმაურა, რომელიც მიზნად ისახავს "რეპრესიული ნარკოპოლიტიკის უფრო მეტად ლიბერალური და დაბალანსებული პოლიტიკით ჩანაცვლებას."
ახალი კანონპროექტი, რომელიც ნარკოპოლიტიკის ლიბერალიზაციას ისახავს მიზნად, საკანონმდებლო ორგანოში ინიცირებულია და საკომიტეტო განხილვები უახლოეს კვირებში დაიწყება.
