კომპანია Yahoo-მ (რომელიც ამ დროისათვის Verizon-ის კუთვნილებაა) დაადასტურა, რომ 2013 წელს ინფორმაციის უმსხვილესი გაჟონვა შეეხებოდა არა 500 მლნ, ან 1 მლრდ მომხმარებელს, როგორც ეს ადრე კომპანიამ დაადასტურა, არამედ კომპანიის ყველა მომხმარებელს, ანუ ყველა ადამიანს ვინც Yahoo-ს იყენებს. საუბარია 3 მლრდ აქაუნთზე.
აღნიშნულის შესახებ ინფორმაცია მას შემდეგ გახდა ცნობილი, რაც Verizon-მა Yahoo იყიდა და ბაზების გაერთიანებისას აღნიშნულ ინფორმაციასაც გადააწყდა.
ირკვევა ისიც, რომ გარდა აქაუნთის მონაცემებისა, 2013 წელს Yahoo-დან სხვა დამატებითმა ინფორმაციამაც გაჟონა, რაც Yahoo-ში რეგისტრაციისას არის საჭირო.
შეგახსენებთ, რომ Verizon-მა Yahoo გასული წლის ივნისში 4,8 მლრდ დოლარად იყიდა.
