ვფიქრობ, ყველაზე სამწუხარო მთელ ამ პროცესში არის ის, რომ დამოუკიდებლობის 26-ე წელს საქართველო იღებს კონსტიტუციას, რომელსაც შემდეგი ხელისუფლება კიდევ ერთხელ შეცვლის, - ამის შესახებ თავდაცვის ყოფილმა მინისტრმა თინა ხიდაშელმა განაცხადა.
როგორც ხიდაშელმა პრეზიდენტისა და არასამთავრობო სექტორის შეხვედრის დასრულების შემდეგ აღნიშნა, კონსენსუსი გვჭირდება იმისთვის, რომ გრძელვადიანად დაიგეგმოს ქვეყანა.
“როგორც ჩანს, მმართველი გუნდი, ამჯერადაც კონსენსუსს აბსოლუტურ სისუსტედ მიიჩნევს და არა აბსოლუტურ აუცილებლობად. პროცესი, რა თქმა უნდა, არასწორად წარიმართა, თუმცა ზუსტად ისე, როგორც ყოველთვის. უკვე მერამდენედ აღმოჩნდა წყევლა საკონსტიტუციო უმრავლესობა, რადგან მან მორიგ ჯერზე აღუძრა ხელისუფლებას ჭეშმარიტებაზე მონოპოლიის აუცილებლობა. ვფიქრობ, ყველაზე სამწუხარო მთელ ამ პროცესში არის ის, რომ დამოუკიდებლობის 26-ე წელს საქართველო იღებს კონსტიტუციას, რომელსაც შემდეგი ხელისუფლება კიდევ ერთხელ შეცვლის. ეს არის მთავარი რეცეპტი იმისა, თუ რატომ არ შედგა ქართული სახელმწიფო, რატომ ვერ შეძლო ჩვენმა ქვეყანამ გაძლიერება და ინსტიტუციური განვითარება. ეს არის მთავარი პრობლემა და არა ის, თუ როგორია მოდელი. კონსენსუსი გვჭირდება იმისთვის, რომ გრძელვადიანად დავგეგმოთ ქვეყანა და ჩვენ ეს ვერასდროს მოვახერხეთ”, - განაცხადა თინა ხიდაშელმა.